ភេសជ្ជៈសំណព្វរបស់កូនស្រីលោក ថាក់ស៊ីន យកមកទទួលថ្នាក់ដឹកនាំធំៗក្នុងស្រុកថៃ មានប្រវត្តិបែបណា?

ភេសជ្ជៈ​មួយប្រភេទដែលមានឈ្មោះថា Mint chocolate កំពុងតែពេញនិយមក្នុងប្រទេសថៃ កាលពីមុន​ធ្លាប់ជាម៉ឺនុយដែលពេញនិយមសម្រាប់តែក្រុមមួយចំនួនប៉ុណ្ណោះ។ វា​ត្រូវ​បាន​គេ​ចាត់​ទុក​ជា​ភេសជ្ជៈ​​​ដែល​មនុស្ស​មួយ​ចំនួន​បាន​ភ្លក្ស​រសជាតិហើយ​និយាយថាចូល​ចិត្ត​ ឬ​អ្នកខ្លះ​ស្អប់​វា​ទាំង​ស្រុង។

ចំពោះមូលហេតុដែលមានអ្នកខ្លះស្អប់និងចូលចិត្ត ដោយសារតែរសជាតិដ៏ខ្លាំងក្លាពីជីអង្កាម ដែលធ្វើឲ្យមនុស្សជាច្រើន មានអារម្មណ៍ដូចជាពួកគេកំពុងញ៉ាំថ្នាំដុសធ្មេញ​មានរសជាតិ mint ឬអ្វីមួយ។ ដូច្នេះហើយ ​ភេសជ្ជៈ​នេះ​មិន​មាន​ប្រជាប្រិយភាព​សូម្បីតែបន្តិចណាឡើយ។ ប៉ុន្តែក៏មិនមែនជា​ភេសជ្ជៈ​ដែល​យើង​អាច​កុម្ម៉ង់​នៅ​គ្រប់​ភោជនីយដ្ឋាន​ពេល​ទៅ​ហាង​កាហ្វេ​បានដូចគ្នាដែរ។

យ៉ាងណាមិញ ​ក្នុងពេល​បច្ចុប្បន្ន​នេះ​​ឈ្មោះរបស់ Mint chocolate ត្រូវបានគេស្គាល់យ៉ាង​ទូលំទូលាយ។ ដោយសារ​តែ​ម៉ឺនុយ​នេះ​បាន​ក្លាយ​ជា​ភេសជ្ជៈ​​ដ៏​លេចធ្លោ​របស់​ហាង​កាហ្វេ​ ThinkLab creative space and cafe របស់​គណបក្ស​ភឿ​ថៃ ហើយ​វា​ក៏​ជា​ភេសជ្ជៈ​សំណព្វ​របស់លោកស្រី Paetongtarn Shinawatra បេក្ខភាព​នាយករដ្ឋមន្ត្រី​នៃ​គណបក្ស​ភឿ​ថៃ និង​ជាកូន​ស្រី​របស់​លោក ថាក់ស៊ីន ស៊ីណាវ៉ាត្រា អតីត​នាយក​រដ្ឋមន្ត្រី​ថៃ។

ទន្ទឹមគ្នានេះ​ កាលពីប៉ុន្មានថ្ងៃមុន​ Mint chocolate ក៏ត្រូវបានគេប្រើជា​ភេសជ្ជៈ​ស្វាគមន៍​ក្នុង​កិច្ចពិភាក្សា​ស្តីពី​ការបង្កើតរដ្ឋាភិបាល​រវាងគណបក្សភឿថៃ គណបក្ស Phumjai Jai, គណបក្ស Chart Pattana Kla, គណបក្ស Chart Thai Pattana និងគណបក្ស Ruam Thai Sang Chart ផងដែរ។​ ដូច្នេះហើយ នេះ​ត្រូវ​បាន​គេ​ចាត់​ទុក​ជា​​ភេសជ្ជៈ​ដែល​មាន​ក្នុង​ប្រវត្តិសាស្ត្រ​នយោបាយ​ថៃ​ក្នុង​ឆ្នាំ​នេះ ​រួម​ជាមួយ​នឹង​ម៉ឺនុយ​កាហ្វេ​ពណ៌​ទឹកក្រូច​នៃ​គណបក្ស​future forward party ដែល​មាន​ឥទ្ធិពល​ស្រដៀង​គ្នា​នឹង​សង្គម។

ទោះយ៉ាងណាក៏ដោយ សម្រាប់អ្នកដែលចង់ដឹងពី Mint chocolate អ្វី​ដែល​បាន​ឮ​និង​ឃើញ​ពី​ដំបូង​​​ហាក់​ដូច​ជា​មិន​ស៊ីសង្វាក់​គ្នា ហើយតើ​វា​មក​ពី​ណា​ ​មក​ដោយ​របៀប​ណា ហើយ​អ្នក​ណា​បង្កើត​រូបមន្ត​នេះឡើងមក?

តាមពិតទៅ ប្រភពដើមនៃ Mint chocolate គឺជារសជាតិដែលត្រូវបានបង្កើតឡើងដំបូងដោយ​ការ៉េម ក្នុងកំឡុងឆ្នាំ ១៩៧៣ នៅប្រទេសអង់គ្លេស។ ក្នុងឆ្នាំនោះ មានពិធីមង្គលការ​ដ៏សំខាន់មួយរបស់ម្ចាស់ក្សត្រី Anne និង Mark Phillips ដូច្នេះហើយរាជវង្សបានស្វែងរកមុខម្ហូបពិសេសសម្រាប់បង្អែមប្រើក្នុងពិធីមង្គលការដ៏សំខាន់មួយនេះ។ បន្ទាប់ពីនោះ និស្សិតផ្នែកធ្វើម្ហូបម្នាក់ឈ្មោះ Marlilyn Ricketts មកពីមហាវិទ្យាល័យ South Devon បានបង្ហាញមុខម្ហូបការ៉េម mint និងសូកូឡា។ ក្រោមឈ្មោះ Mint Royale វាហាក់បីដូចជាបង្អែមរបស់នាងត្រូវបានជ្រើសរើសដោយរាជវង្សដើម្បីបម្រើដល់ភ្ញៀវក្នុងពិធីមង្គលការតែប៉ុណ្តោះ។ ក្រោយមក វា​ក្លាយជា​ល្បី​ល្បាញ និង​បាន​បើក​ពិភព​នៃ​ភេសជ្ជៈទៅ​កាន់​ឧស្សាហកម្ម​អាហារ​ពិភពលោក​តាំង​ពី​ពេល​នោះ​មក៕

ប្រែសម្រួល៖ សាង ស្រីល័ក្ខ

ប្រភព៖Sanook

ចុចអាន៖លោក ប្រាយុទ្ធ សង្ឃឹមថានឹងមានការផ្ទេរអំណាចដោយសន្តិវិធី