វៀតណាម អនុញ្ញាតឲ្យប្រើប្រាស់វ៉ាក់សាំងការពារជំងឺប៉េស្តជ្រូកអាហ្រ្វិក ដែលផលិតក្នុងប្រទេស

ក្រសួងកសិកម្ម និងអភិវឌ្ឍន៍ជនបទវៀតណាម (MARD) កាលពីថ្ងៃចន្ទបានចេញសេចក្តីណែនាំអនុញ្ញាតឲ្យកសិករប្រើប្រាស់វ៉ាក់សាំងផលិតក្នុងស្រុកចំនួន ២ គឺវ៉ាក់សាំង NAVET-ASFVAC និងវ៉ាក់សាំង AVAC ASF LIVE សម្រាប់ប្រឆាំងនឹងជំងឺប៉េស្តជ្រូកអាហ្រិក (ASF) នៅទូទាំងប្រទេស ។

បច្ចុប្បន្នវ៉ាក់សាំង​ទាំងពីរប្រភេទ​ដែលផលិតដោយក្រុមហ៊ុនវៀតណាមនេះ ត្រូវបានទទួលស្គាល់សម្រាប់ការធ្វើពាណិជ្ជកម្មទាំងក្នុងប្រទេស​ និងក្រៅប្រទេស បន្ទាប់ពីការសាកល្បងយ៉ាងជោគជ័យទៅលើជ្រូកនៅកសិដ្ឋានក្នុងប្រទេសអស់រយៈពេលជាច្រើនមកនេះ ។

បន្ទាប់ពីការធ្វើតេស្តក្នុងខែកក្កដារួចមក លទ្ធផលបានបង្ហាញថា ជ្រូកដែលទទួលថ្នាំបង្ការ គឺមានសុខភាពល្អ ហើយជាមធ្យមមានជ្រូកជាង ៩៥ ភាគរយ គឺដុះអង់ទីគ័រខ្ពស់ បន្ទាប់ពីចាក់វ៉ាក់សាំងហើយ ។

ទន្ទឹមនឹងនេះ តាមរយៈការវាយតម្លៃពីក្រសួងកសិកម្មសហរដ្ឋអាមេរិកដែលធ្វើឡើងក្នុងខែមេសាដល់ខែឧសភា ឆ្នាំ ២០២៣ ក៏បានបង្ហាញដែរថា ការផលិតវ៉ាក់សាំងជំងឺប៉េស្តជ្រូកអាហ្រិកដែលផលិតនៅវៀតណាម គឺត្រូវនឹងស្តង់ដារអន្តរជាតិ ហើយក៏នឹងត្រៀមដាក់ជូនទៅអង្គការពិភពលោកសម្រាប់សុខភាពសត្វ (WOAH) ផងដែរ ។

ទោះជាយ៉ាងណា ក្រុមហ៊ុនវ៉ាក់សាំង ក៏នឹងត្រូវបញ្ជូនគំរូវ៉ាក់សាំងទៅកាន់មជ្ឈមណ្ឌលជាតិគ្រប់គ្រងថ្នាំពេទ្យ និងជីវផលិតផលលេខក្នុងប្រទេស ដើម្បីត្រួតពិនិត្យគុណភាពសម្រាប់វ៉ាក់សាំងយ៉ាងហោចណាស់ ១០ បាច់បន្ថែមទៀតផងដែរ ៕

ប្រែសម្រួល៖​ នាង រតនៈ

ប្រភព ៖ VN Express