ទីក្រុងព្យុងយ៉ាង អញ្ជើញ២ប្រទេស ឲ្យចូលរួម ខួបនៃបទឈប់បាញ់សង្គ្រាមកូរ៉េ

ប្រទេសកូរ៉េខាងជើង បានអញ្ជើញគណៈប្រតិភូមកពីប្រទេសចិន និងរុស្ស៊ី ដើម្បីចូលរួមក្នុងការប្រារព្ធខួបលើកទី៧០នៃបទឈប់បាញ់សង្គ្រាមកូរ៉េ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាករណីដំបូងហើយដែលកូរ៉េខាងជើង ត្រូវបានគេដឹងថាអញ្ជើញភ្ញៀវបរទេសឲ្យចូលមកប្រទេស ចាប់តាំងពីខ្លួនបានបិទព្រំដែនទាំងអស់ ដើម្បីទប់ស្កាត់ជំងឺរាតត្បាត ថ្វីបើការដឹកជញ្ជូនទំនិញបានដំណើរការឡើងវិញខ្លះៗរវាងកូរ៉េខាងជើង និងចិនកាលពីឆ្នាំមុនក៏ដោយ។

ប្រព័ន្ធផ្សព្វផ្សាយរដ្ឋកូរ៉េខាងជើង (KCNA) កាលពីថ្ងៃអង្គារទី២៥ខែកក្កដា បានរាយការណ៍ថា រដ្ឋមន្ត្រីការពារជាតិរុស្ស៊ីលោក Sergei Shoigu ត្រូវបានអញ្ជើញដោយក្រសួងការពារជាតិនៃប្រទេសកូរ៉េខាងជើង សម្រាប់ខួបលើកទី៧០នៃ ជ័យជម្នះក្នុងសង្គ្រាមរំដោះមាតុភូមិ។

ទន្ទឹមនោះ ក្រសួងការពារជាតិរុស្ស៊ី បញ្ជាក់ថា គណៈប្រតិភូរុស្ស៊ីដឹកនាំដោយលោក Shoigu នឹងធ្វើទស្សនកិច្ចកូរ៉េខាងជើងនៅថ្ងៃទី ២៦ដល់២៨ខែកក្កដា ដើម្បីចូលរួមក្នុងពិធីនេះ។

លើសពីនេះ កូរ៉េ​ខាង​ជើង​ក៏​បាន​អញ្ជើញ​ភាគី​ចិន និង​គណៈប្រតិភូ​រដ្ឋាភិបាល ឲ្យ​ចូលរួម​ផងដែរ ។ យោងតាមការចុះផ្សាយរបស់សារព័ត៌មាន KCNA បានឲ្យដឹងថា គណៈកម្មាធិការមជ្ឈិមនៃគណបក្សពលករកំពុងកាន់អំណាចរបស់កូរ៉េខាងជើង និងរដ្ឋាភិបាលរបស់ខ្លួន បានអញ្ជើញគណៈប្រតិភូចិន ដឹកនាំដោយលោក Li Hongzhong ដែលជាសមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនិស្តចិន ឲ្យចូលរួមក្នុងការប្រារព្ធខួបនេះ៕

ប្រែសម្រួល៖ Vann Vann

ប្រភព៖ ANI

ចុចអាន៖ ទើបគំរាមអាមេរិក ពេលនេះកូរ៉េខាងជើង បាញ់មីស៊ីលច្រើនគ្រាប់ ដើម្បីបង្ហាញកម្លាំង