មូលហេតុចម្បងចំនួន ២ ដែលធ្វើឲ្យ អ៊ុយក្រែន បរាជ័យវាយបកលើ រុស្ស៊ី

រហូតមកដល់ពេលនេះ ប្រតិបត្តិការវាយបកទ្រង់ទ្រាយធំរបស់អ៊ុយក្រែនប្រឆាំងនឹងរុស្ស៊ីដែលបានចាប់ផ្ដើមជាង ១ ខែកន្លងមកនេះ មិនទទួលបានផ្លែផ្កានៅគោលដៅណាមួយឡើយ ហើយថែមទាំងឈានទៅដល់ការស្លាប់ និងរងរបួសលើកងទ័ពអ៊ុយក្រែនក្នុងកម្រិតដ៏ខ្ពស់ផងដែរ ។

ពាក់ព័ន្ធនឹងបញ្ហានេះដែរ រដ្ឋមន្ត្រីការពារជាតិអ៊ុយក្រែន លោក Oleksii Reznikov បានចេញការពន្យល់ និងប្រាប់ពីមូលហេតុចម្បងចំនួន ២ ដែលធ្វើឲ្យប្រតិបត្តិការវាយបករបស់រដ្ឋាភិបាលទីក្រុងកៀវ ទទួលរងបរាជ័យ និងមិនសម្រេចបានតាមផែនការគ្រោងទុក ។

លោក Reznikov បានបញ្ជាក់ថា “ប្រតិបត្តិការវាយបករបស់អ៊ុយក្រែនមានភាពយឺតយ៉ាវ និងមិនសម្រេចដូចតាមផែនការគ្រោងទុក គឺដោយសារតែការបង្កប់គ្រាប់មីនដ៍សាហាវរបស់រុស្ស៊ី និងកង្វះអាវុធការពារដែនអាកាសរបស់លោកខាងលិចដែលផ្ដល់ឲ្យអ៊ុយក្រែនមិនដូចចិត្តចង់បាន” ។

លោក Reznikov បាន​ប្រាប់ទូរទស្សន៍ CNN ក្នុង​បទសម្ភាសន៍​មួយ​ដែល​បាន​ចេញ​ផ្សាយ​កាល​ពី​ពេលថ្មីៗនេះថា  “បច្ចុប្បន្នទាហាន​អ៊ុយក្រែន​កំពុង​តែទប់ទល់នឹងអាវុធ​ដ៏​ច្រើន​សន្ធឹក​សន្ធាប់របស់សត្រូវ ហើយវាក៏ពិបាកផងដែរក្នុងការបុកទម្លុះវាលមីនដ៏ធំល្វឹងល្វើយនៅភាគខាងត្បូងរបស់រុស្ស៊ី” ។

ទន្ទឹមនោះ ការអត្ថាធិប្បាយរបស់រដ្ឋមន្ត្រីការពារជាតិអ៊ុយក្រែនបានធ្វើឡើង បន្ទាប់ពីលោកប្រធានាធិបតី Volodymyr Zelensky សារភាពថា ប្រតិបត្តិការវាយលុកដែលបានចាប់ផ្តើមនៅដើមខែមិថុនា បានដំណើរការយឺតជាងការចង់បានឆ្ងាយណាស់ ជាពិសេសរថពាសដែករបស់អ៊ុយក្រែនរហូតដល់ ២០ ភាគរយបានទទួលរងការខាតបង់ នៅពេលបើកការវាយប្រហារទៅលើទីតាំងដ៏រឹងមាំរបស់រុស្ស៊ី ។

គួរបញ្ជាក់ថា អ៊ុយក្រែនបានបើកការវាយលុកទ្រង់ទ្រាយធំប្រឆាំងនឹងទីតាំងមួយចំនួនរបស់រុស្ស៊ីកាលពីថ្ងៃទី៤ ខែមិថុនា ប៉ុន្តែមិនបានសម្រេចគោលដៅណាមួយឡើយ ជាពិសេសការវាយលុកលើដីគោក ដោយសារតែផ្ទៃដីអ៊ុយក្រែនប្រមាណ ២០ ម៉ឺនគីឡូម៉ែត្រដែលគ្រប់គ្រងដោយកងកម្លាំងរុស្ស៊ីត្រូវបានដាក់ពង្រាយមីន ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ពូទីន ថា លោកខាងលិចខកចិត្តលើ អ៊ុយក្រែន ដែលខំផ្ដល់អាវុធទៅឲ្យ​ហើយ នៅតែបរាជ័យវាយបកលើ រុស្ស៊ី