ចូលកាន់តំណែងជារដ្ឋមន្ត្រីការបរទេសមិនបានប៉ុន្មានផង លោក Wang Yi បំពេញភារកិច្ចទៅក្រៅប្រទេសភ្លាម

ក្រសួងការបរទេសតួកគីបាននិយាយកាលពីថ្ងៃអង្គារថា រដ្ឋមន្ត្រីការបរទេសចិនដែលទើបតែតែងតាំងថ្មីគឺលោក Wang Yi បានបំពេញទស្សនកិច្ចទៅកាន់ប្រទេសតួកគីនៅថ្ងៃពុធនេះ ដើម្បីពិភាក្សាការងារមួយចំនួន ។

ក្រសួងការបរទេសបាននិយាយនៅក្នុងសេចក្តីថ្លែងការណ៍មួយថា ក្នុងអំឡុងពេលកិច្ចប្រជុំនោះ រដ្ឋមន្ត្រីការបរទេសតួកគីលោក Hakan Fidan និងលោក Wang Yi នឹងពិភាក្សាអំពីទិដ្ឋភាពនៃទំនាក់ទំនងទ្វេភាគី តួកគី-ចិន ខណៈការអភិវឌ្ឍន៍ក្នុងតំបន់ និងពិភពលោកបច្ចុប្បន្ន ក៏នឹងស្ថិតនៅក្នុងរបៀបវារៈផងដែរ ។

ទន្ទឹមនោះ ការអញ្ជើញបំពេញទស្សនកិច្ចរបស់លោក Wang Yi ទៅកាន់ប្រទេសតួកគីបានកើតឡើង បន្ទាប់ពីរដ្ឋមន្ត្រីការបរទេសចាស់របស់ចិនគឺលោក Qin Gang បានលាលែងពីតំណែង ក្រោយពេលដែលមិនត្រូវបានគេឃើញជាសាធារណៈអស់រយៈពេល ១ ខែ ។

គួរបញ្ជាក់ថា ទំនាក់ទំនងការទូតរវាងប្រទេសតួកគី និងចិនត្រូវបានបង្កើតឡើងក្នុងឆ្នាំ ១៩៧១ ហើយទំនាក់ទំនងទ្វេភាគីរបស់ប្រទេសទាំងពីរ បានឡើងដល់កម្រិតនៃ “កិច្ចសហប្រតិបត្តិការយុទ្ធសាស្ត្រ” ក្នុងឆ្នាំ ២០១០ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ វិមានក្រឹមឡាំង ប្រាប់កាលបរិច្ឆេទដែលលោក ពូទីន គ្រោងបំពេញទស្សន កិច្ចនៅ ចិន