បុរស ចិន ម្នាក់ អង្គុយផឹកកាហ្វេក្នុងហាង ត្រូវស្លាបកង្ហារធ្លាក់ចំក្បាលភ្លាមៗ

កាមេរ៉ា CCTV នៅខាងក្នុងហាងកាហ្វេមួយក្នុងទីក្រុង Leshan ខេត្ត Sichuan ប្រទេសចិន កាលពីថ្ងៃទី ០៦ ខែកក្កដា បានកត់ត្រានាទីនៃគ្រោះថ្នាក់ដែល​បានកើតឡើងចំពោះបុរស​ម្នាក់​មានឈ្មោះ Yuan។ បន្ទាប់ពីគាត់បានចូលមកអង្គុយកៅអីមួយសន្ទុះ កង្ហារ​ពិតាន​ស្រាប់​តែធ្លាក់មក​លើក្បាល​មួយរំពេច។

លោក Yuan បាន​និយាយ​ថា ដំបូង​ឡើយ​គាត់​គិត​ថា​គាត់​កំពុង​ត្រូវ​បាន​គេ​លេងសើច​​ (Prank)។ ហេតុនេះ​ហើយ​គាត់​ខឹង​ជា​ខ្លាំង​ ក៏​​វាយ​តប​វិញចំពោះមនុស្សនៅក្រោយខ្នង។ ប៉ុន្តែពេល​គាត់​មើល​ទៅ​លើ​ពិតាន​ ទើប​ដឹងថា​នេះ​មិនមែនជារឿងកំប្លែង​ទេ។ តែវា​ជា​ឧបទ្ទវហេតុ​អកុសល​មួយ​ដែល​គាត់​ត្រូវ​ក្លាយជាជនរងគ្រោះដោយ​កង្ហារ​ពិដាន។

ត្បិតថាគាត់មិនរងរបួសធ្ងន់ធ្ងរក៏ដោយ។ ប៉ុន្តែ​ម្ចាស់​ហាង​នៅតែ​យក​គាត់​ទៅ​មន្ទីរពេទ្យ​ដើម្បី​ពិនិត្យ​របួសស្នាមឲ្យបានលម្អិតជាងមុន។ ហើយក៏ជាដំណឹងល្អ​ដែលវេជ្ជបណ្ឌិតបាន​បញ្ជាក់ថា មានតែស្នាមរបួសនៅលើស្បែកប៉ុណ្ណោះ។ បន្ទាប់ពី​ព្យាបាល​រួច​បុរសរងគ្រោះ​អាចទៅផ្ទះបានវិញធម្មតា។

ជាមួយគ្នានេះដែរ អ្នកលេងអ៉ិនធើណេតជាច្រើនក្រោយបានទស្សនាឃ្លិបដ៏រន្ធត់រួចមកក៏បញ្ចេញមតិថាបុរសម្នាក់នោះពិតជាសំណាងហើយដែលមានរបួសតិចតួចលើខ្លួន។ ប្រសិនបើកង្ហារប៉ះចំពីមុខត្រូវភ្នែកវិញ អាចនឹងមិនស្រាលដូចពេលនេះទេ៕

ប្រែសម្រួល៖ សាង ស្រីល័ក្ខ

ប្រភព៖docbao

ចុចអាន៖មហាសេដ្ឋី ចិន មួយរូប ប្រឡងចូលមហាវិទ្យាល័យ ២៧ ដង នៅតែបរាជ័យ