ខែកក្កដា ឆ្នាំ២០២៣ នឹងក្លាយជាខែក្តៅបំផុត ក្នុងប្រវត្តិសាស្ត្រភពផែនដី

អគ្គលេខាធិការអង្គការសហប្រជាជាតិ លោក Antonio Guterres បានព្រមានកាលពីថ្ងៃព្រហស្បតិ៍ថា បម្រែបម្រួលអាកាសធាតុ បានឈានដល់កម្រិតដ៏គួរឲ្យភ័យខ្លាច ដោយខែកក្កដានេះ នឹងក្លាយជាខែដែលក្តៅបំផុតនៅក្នុងប្រវត្តិសាស្រ្តផែនដី ហើយលោកបានបង្ហាញពីផលវិបាកកាន់តែច្រើននាពេលខាងមុខ ប្រសិនបើមិនមានការធ្វើសកម្មភាពខ្លាំងក្លាជាងនេះ ដើម្បីកាត់បន្ថយការប្រើប្រាស់ឥន្ធនៈហ្វូស៊ីលទេនោះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Guterres បានប្រាប់អ្នកយកព័ត៌មាននៅទីក្រុងញូវយ៉កថា “យុគសម័យនៃការឡើងកម្តៅផែនដីត្រូវបានបញ្ចប់ ហើយយុគសម័យនៃការពុះកញ្ជ្រោលជាសកល បានចូលមកដល់។ ខ្យល់មិនអាចឲ្យមនុស្សដកដង្ហើមបាន កម្តៅមិនអាចឲ្យមនុស្សទ្រាំបាន ហើយកម្រិតនៃប្រាក់ចំណេញពីឥន្ធនៈហ្វូស៊ីល និងភាពអសកម្មនៃអាកាសធាតុគឺមិនអាចទទួលយកបានឡើយ”។

ដោយដកស្រង់ទិន្នន័យពីអង្គការឧតុនិយមពិភពលោក (WMO) និងទីភ្នាក់ងារបម្រែបម្រួលអាកាសធាតុ Copernicus របស់ EU, លោក Guterres បានអះអាងថា ខែកក្កដានឹងក្លាយជាខែក្តៅបំផុតដែលមិនធ្លាប់មានសោះ ហើយ​មនុស្ស​ជាតិនឹងអង្គុយលើ​​កៅអី​ដ៏​ក្តៅ​គគុក​។

ស្របពេលជាមួយគ្នានោះ លោក Chris Hewitt នាយកទីភ្នាក់ងារអាកាសធាតុរបស់ WMO បានប្រាប់អ្នកយកព័ត៌មានថា មានលទ្ធភាព ៩៨ ភាគរយដែលយ៉ាងហោចណាស់ ៥ ឆ្នាំខាងមុខនេះ នឹងបំបែកកំណត់ត្រាសម្រាប់ឆ្នាំក្តៅបំផុតក្នុងប្រវត្តិសាស្រ្ត។

ងាកទៅលោក Guterres ឯណោះវិញ លោកបានអះអាងថា មិនមានពេលទៀតទេសម្រាប់មេដឹកនាំពិភពលោកដើម្បីធ្វើការដោះសារចំពោះបញ្ហានេះ ខណៈ​សីតុណ្ហភាព​ដែលកំពុងកើន​ឡើង គឺ​ទាមទារ​ឲ្យ​ពន្លឿន​ការធ្វើ​សកម្មភាព។

ចំណែកក្នុងចំណោមសកម្មភាពដែលអគ្គលេខាធិការអង្គការសហប្រជាជាតិ បានអំពាវនាវគឺ ត្រូវបញ្ចប់ការប្រើប្រាស់ធ្យូងថ្មនៅក្នុងប្រទេសអភិវឌ្ឍត្រឹមឆ្នាំ២០៣០ និងនៅក្នុងប្រទេសដទៃទៀតនៃពិភពលោកត្រឹមឆ្នាំ២០៤០ ៕

ប្រែសម្រួល៖ Vann Vann

ប្រភព៖ RT

ចុចអាន៖ ឥទ្ធិពលនៃបម្រែបម្រួលអាកាសធាតុ បង្កផលប៉ះពាល់កាន់តែខ្លាំងដល់ ទ្វីបអាស៊ី