ជំនិតលោក Zelensky ប្រឈមជាប់ពន្ធនាគារ៣ឆ្នាំ ព្រោះធ្វើពុតជាឈឺ ដើម្បីទៅដើរលេងនៅ ម៉ាល់ឌីវ

សមាជិកសភាអ៊ុយក្រែនម្នាក់ បានលាឈប់ពីការងារ ហើយប្រឈមមុខនឹងការជាប់ពន្ធនាគាររយៈពេល៣ឆ្នាំ បន្ទាប់ពីគាត់បានធ្វើពុតជាឈឺ ហើយសុំច្បាប់ឈប់សម្រាក ប៉ុន្តែបែរជានាំគ្រួសាររបស់គាត់ទៅដើរលេងនៅប្រទេសម៉ាល់ឌីវឯណោះវិញ ថ្វីបើអ៊ុយក្រែន ដាក់បម្រាមមន្ត្រីមិនឲ្យចាកចេញពីប្រទេសក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Yuriy Aristov អាយុ៤៨ឆ្នាំ បានទៅប្រទេសប៉ូឡូញ ក្នុងដំណើរលក្ខណៈការងារ ប៉ុន្តែបន្ទាប់មកបានធ្វើពុតជាឈឺ ហើយលួចទៅសណ្ឋាគារលំដាប់ផ្កាយប្រាំឈ្មោះ Waldorf Astoria នៅលើកោះ Ithaafushi នៃប្រទេសម៉ាល់ឌីវ ឯណោះវិញ។

ស្របពេលប្រទេសមានសង្គ្រាម រដ្ឋាភិបាលទីក្រុងកៀវ បានដាក់បម្រាមមិនឲ្យមន្ត្រីចាកចេញពីប្រទេស ខណៈបុរសដែលមានអាយុពី១៨ទៅ៦០ឆ្នាំ ត្រូវការការអនុញ្ញាតជាពិសេស បើចង់ចាកចេញ។

ព័ត៌មាននេះ ក៏បាន​បង្កឲ្យ​មាន​ប្រតិកម្ម​យ៉ាង​ខ្លាំង​ ពី​ប្រធានាធិបតី​អ៊ុយក្រែន​លោក Volodymyr Zelensky ផងដែរដោយលោកនិយាយថា “ការលួចទៅលេងកោះ ទៅលេងរមណីយដ្ឋានពេលដែលប្រទេសកំពុងមានសង្គ្រាម គឺជាការក្បត់ផ្ទៃក្នុង”។

ស្របពេលជាមួយគ្នានោះដែរ ការិយាល័យស៊ើបអង្កេតរដ្ឋ បានបើកសំណុំរឿងមួយ ក្រោមការចោទប្រកាន់ពីបទក្លែងបន្លំ ដែលអាចជាប់ពន្ធនាគាររហូតដល់បីឆ្នាំ។ សេវាសន្តិសុខអ៊ុយក្រែន(SBU) ក៏បានឆែកឆេរផ្ទះរបស់គាត់ផងដែរ កាលពីថ្ងៃព្រហស្បតិ៍ទី២៧ខែកក្កដា។

សរុបមក លោក Aristov បានស្ថិតនៅក្រៅប្រទេសរយៈពេលមួយខែកន្លះមកហើយ គឺចាប់ពីថ្ងៃទី៥ខែមិថុនាដល់ថ្ងៃទី២២ខែកក្កដា។

ដោយឡែក សភាអ៊ុយក្រែនគ្រោងនឹងបោះឆ្នោតលើការលាលែងពីតំណែងរបស់លោក Aristov ដែលធ្លាប់ជាអនុប្រធានគណៈកម្មាធិការសន្តិសុខជាតិ ការពារជាតិ និងស៊ើបការណ៍សម្ងាត់ផងដែរ។

គាត់គឺជាជំនិតរបស់លោក Zelensky ដោយអ្នកទាំងពីរ ធ្លាប់ជាដៃគូនៅក្នុងអាជីវកម្មអាហារសមុទ្រ និងភោជនីយដ្ឋាន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ សកម្មជនបរិស្ថានវ័យក្មេងទៅជួបលោក Zelensky ដើម្បីរិះគន់ការបំផ្លិច បំផ្លាញរបស់ រុស្ស៊ី នៅអ៊ុយក្រែន