លោក ពូទីន៖​ ណាតូ មិនព្រមពិភាក្សាជាមួយ រុស្ស៊ី

ប្រធានាធិបតីរុស្ស៊ី លោក វ្ល៉ាឌីមៀរ ពូទីន និយាយថា រុស្ស៊ីបានត្រៀមលក្ខណៈដើម្បីស្វែងរកដំណោះស្រាយការទូតចំពោះវិបត្តិនៅអ៊ុយក្រែន ប៉ុន្តែទីក្រុងកៀវ និងអ្នកគាំទ្ររបស់ខ្លួននៅសហរដ្ឋអាមេរិកនិងអង្គការណាតូ បានបដិសេធនិយាយជាមួយទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកពូទីន បានប្រាប់មេដឹកនាំអាហ្រ្វិកក្នុងអំឡុងពេលកិច្ចប្រជុំកំពូលរុស្ស៊ី-អាហ្វ្រិក នៅទីក្រុង St. Petersburg កាលពីថ្ងៃសុក្រថា “ភាពខ្វែងគំនិតគ្នាទាំងអស់ ត្រូវតែដោះស្រាយនៅតុចរចា។ បញ្ហាគឺត្រង់ថា អ៊ុយក្រែន កំពុងបដិសេធនិយាយជាមួយយើង”។

លោកពូទីននិយាយថា “​​បច្ចុប្បន្ន​ អ៊ុយក្រែន ក៏​កំពុង​បដិសេធ​ការ​ចរចា​ដែរ ហើយ​បាន​ប្រកាស​រឿងនេះជា​ផ្លូវ​ការ។ ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី ថែមទាំងបានចុះហត្ថលេខាលើក្រឹត្យពាក់ព័ន្ធទៀតផង”។

មេដឹកនាំរុស្ស៊ីអះអាងថា ឫសគល់នៃជម្លោះរវាងទីក្រុងមូស្គូនិងទីក្រុងកៀវ គឺដោយសារសហរដ្ឋអាមេរិក និងណាតូ បង្កើតការគំរាមកំហែងដល់សន្តិសុខរបស់រុស្ស៊ី។ ទោះបីជាយ៉ាងណាក៏ដោយ ទីក្រុងវ៉ាស៊ីនតោននិងសម្ព័ន្ធមិត្ត ក៏បានច្រានចោលការចរចាលើបញ្ហានៃការធានាសន្តិសុខស្មើភាព សម្រាប់ភាគីទាំងអស់ រួមទាំងរុស្ស៊ីផងដែរ។

សូមបញ្ជាក់ កាលពីខែមុន មេដឹកនាំអ៊ុយក្រែន បានរំលឹកឡើងវិញនូវជំហររបស់គាត់ថា កិច្ចពិភាក្សាជាមួយទីក្រុងមូស្គូ អាចចាប់ផ្តើមបាន លុះត្រាតែកងកម្លាំងរុស្ស៊ីដកខ្លួនចេញពីទឹកដីអ៊ុយក្រែនទាំងអស់ រួមទាំងតំបន់គ្រីមៀផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន ថា អាមេរិក កំពុងយកប្រាក់ដុល្លារធ្វើជាអាវុធ