សិង្ហ​បុរី​ ប្រហារជីវិត​ស្ត្រី​ម្នាក់ ​ពីបទ​ជួញដូរ​គ្រឿងញៀន​

ប្រទេសសិង្ហបុរីកាលពីថ្ងៃសុក្រទី២៨ខែកក្កដា បានព្យួរ.កអ្នកទោសស្រីម្នាក់ ដែលត្រូវបានកាត់ទោសក្នុងឆ្នាំ២០១៨ ពីបទជួញដូរថ្នាំញៀនហេរ៉ូអ៊ីនចំនួន៣០ក្រាមចូលប្រទេស ដោយនេះជាករណីដំបូងហើយ ដែលស្ត្រីត្រូវបានប្រហារជីវិតនៅក្នុងប្រទេសអាស៊ីមួយនេះ នារយៈពេលជិត២ទសវត្សរ៍ចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យគ្រឿងញៀនកណ្តាលរបស់ប្រទេសបាននិយាយថា ស្ត្រីជនជាតិសិង្ហបុរីអាយុ ៤៥ ឆ្នាំឈ្មោះ Saridewi Djamani ត្រូវបានប្រហារជីវិតកាលពីថ្ងៃសុក្រ។ នាងគឺជាអ្នកទោសស្ត្រីដំបូងដែលត្រូវបានសម្លាប់ ចាប់តាំងពីស្ត្រីអាយុ៣៦ឆ្នាំម្នាក់ ត្រូវបានប្រហារជីវិតក្នុងឆ្នាំ២០០៤ ពីបទជួញដូរគ្រឿងញៀនដូចគ្នានេះ។

នៅក្នុងសេចក្តីថ្លែងការណ៍មួយ លោក Chiara Sangiorgio អ្នកឯកទេសលើកំណែទម្រង់ទោសប្រហារជីវិត សម្រាប់អង្គការលើកលែងទោសអន្តរជាតិ បានហៅការប្រហារជីវិតនេះថា “ខុសច្បាប់” ហើយនិយាយថា វាបង្ហាញពីការមិនយកចិត្តទុកដាក់ និងសោកនាដកម្មលើកង្វះខាតទាំងស្រុងនៃកំណែទម្រង់ទោសប្រហារជីវិតនៅក្នុងប្រទេសសិង្ហបុរី។ អាជ្ញាធរសិង្ហបុរីនៅតែបន្តបំពានច្បាប់និងស្តង់ដារសិទ្ធិមនុស្សអន្តរជាតិ។

គួរបញ្ជាក់ថា ការសម្លាប់ Saridewi គឺជាការប្រហារជីវិតលើកទី១៥ហើយ ចាប់តាំងពីប្រទេសសិង្ហបុរី បានចាប់ផ្តើមទោសប្រហារជីវិតឡើងវិញក្នុងខែមីនាឆ្នាំ២០២២ បន្ទាប់ពីការអនុវត្តទោសនេះត្រូវបានផ្អាកអស់រយៈពេល២ឆ្នាំ អំឡុងពេលជំងឺរាតត្បាតកូវីដ១៩៕

ប្រែសម្រួល៖​ Vann Vann

ប្រភព៖ RT