តុលាការធម្មនុញ្ញ ថៃ ដាក់ថ្ងៃប្រកាសគាំទ្រ ឬបដិសេធញត្តិឲ្យលោក Pita ឈរឈ្មោះនាយករដ្ឋមន្ត្រីជុំទី២ ឬអត់

តុលាការធម្មនុញ្ញរបស់ប្រទេសថៃបានកំណត់ពេលកិច្ចប្រជុំនៅថ្ងៃទី៣ ខែសីហា ដើម្បីពិចារណាថាតើត្រូវគាំទ្រ ឬជំទាស់ញត្តិរបស់ក្រុមមន្ត្រី ពាក់ព័ន្ធនឹងសេចក្ដីសម្រេចរបស់សភាដែលបានបោះឆ្នោតដកសិទ្ធិលោក Pita Limjaroenrat មិនឲ្យឈរឈ្មោះធ្វើជានាយករដ្ឋមន្ត្រីជុំទី ២ កាលពីថ្ងៃទី១៩ ខែកក្កដា ។

បើតាមអ្នកជំនាញច្បាប់បានឲ្យដឹងថា តុលាការធម្មនុញ្ញមានជម្រើស ២ គឺអាចយកញត្តិបដិសេធរបស់អ្នកតំណាងរាស្រ្តដើម្បីធ្វើការពិចារណាបន្តតែងតាំងលោក Pita និងចេញដីកាផ្អាកដំណើរការជ្រើសរើសនាយករដ្ឋមន្ត្រីរបស់សភា រហូតដល់មានសេចក្តីសម្រេចពីតុលាការទាក់ទងនឹងញត្តិនេះ ។

ពាក់ព័ន្ធនឹងបញ្ហានេះដែរ ប្រធានសភាលោក Wan Muhamad Noor Matha ក៏បានចេញបញ្ជាឲ្យលុបចោលកិច្ចប្រជុំសភា ដើម្បីជ្រើសរើសនាយករដ្ឋមន្ត្រីកាលពីថ្ងៃព្រហស្បតិ៍ ទី២៧ ខែកក្កដារួចហើយផងដែរ ដោយរង់ចាំការសម្រេចពីតុលាការសិន ខណៈកិច្ចប្រជុំ​​របស់​ព្រឹទ្ធសភា និង​រដ្ឋសភាជាមួយ​ប្រធាន​សភា ក៏​ត្រូវ​បាន​លុបចោល​ដែរ ​។

គួរបញ្ជាក់ថា ប្រសិនបើសេចក្ដីសម្រេចរបស់តុលាការធម្មនុញ្ញនៅតែរារាំងលោក Pita មិនឲ្យឈរឈ្មោះបោះឆ្នោតជ្រើសរើសជានាយករដ្ឋមន្ត្រីនៅជុំទី២ ទៀតនោះ គណបក្សភឿថៃត្រៀមនឹងតែងតាំងបេក្ខជននាយករដ្ឋមន្ត្រីជំនួសគណបក្សចលនាឆ្ពោះទៅមុខ ដើម្បីបង្កើតរដ្ឋាភិបាលចម្រុះថ្មី ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post