ចិន ថា អាមេរិក កំពុងប្រែក្លាយកោះតៃវ៉ាន់ ទៅជា “ឃ្លាំងរំសេវ”

ប្រទេសចិន បាននិយាយកាលពីថ្ងៃអាទិត្យទី៣០ខែកក្កដាថា ការអនុម័តរបស់ទីក្រុងវ៉ាស៊ីនតោននូវកញ្ចប់ជំនួយយោធាទំហំទឹកប្រាក់៣៤៥លានដុល្លារឲ្យទីក្រុងតៃប៉ិនាពេលថ្មីៗនេះ នឹងប្រែក្លាយកោះនេះ ទៅជា “ឃ្លាំងរំសេវ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chen Binhua អ្នកនាំពាក្យការិយាល័យកិច្ចការកោះតៃវ៉ាន់របស់ទីក្រុងប៉េកាំង បាននិយាយនៅក្នុងសេចក្តីថ្លែងការណ៍មួយថា “មិនថាកងកម្លាំងផ្តាច់ខ្លួនរបស់តៃវ៉ាន់ យកលុយបង់ពន្ធរបស់ប្រជាជនសាមញ្ញទៅចំណាយប៉ុន្មាននោះទេ ឬមិនថាមានអាវុធរបស់អាមេរិកច្រើនប៉ុនណានោះទេ វាមិនអាចធ្វើឲ្យរង្គោះរង្គើ ដល់ការតាំងចិត្តរបស់យើង ក្នុងការដោះស្រាយបញ្ហាតៃវ៉ាន់បានឡើយ”។

លោក Chen បន្ថែមថា ជំនួយយោធាជាបន្តរបស់ទីក្រុងវ៉ាស៊ីនតោន គឺនឹងប្រែក្លាយតៃវ៉ាន់ ទៅជាឃ្លាំងរំសេវ ដោយបង្កឲ្យមានការគំរាមកំហែងសង្រ្គាម នៅច្រកសមុទ្រតៃវ៉ាន់។

ការព្រមានរបស់ទីក្រុងប៉េកាំង កើតឡើងបន្ទាប់ពីសហរដ្ឋអាមេរិក បានបើកភ្លើងខៀវ ផ្តល់កញ្ចប់ជំនួយចំនួន៣៤៥លានដុល្លារ ទៅឲ្យតៃវ៉ាន់ដើម្បីបង្កើនឃ្លាំងយោធារបស់ខ្លួន។

សេតវិមានបាននិយាយកាលពីថ្ងៃសុក្រថា កញ្ចប់នេះនឹងរួមបញ្ចូលទាំងការបណ្តុះបណ្តាលផ្នែកការពារជាតិ និងការអប់រំសម្រាប់កងទ័ពតៃវ៉ាន់ ផងដែរ។

ក្រៅពីនេះ ជំនួយនោះក៏នឹងរួមបញ្ចូលនូវប្រព័ន្ធមីស៊ីលពីដីទៅអាកាស MANPADS និងសព្វាវុធផ្សេងទៀត ដើម្បីបង្កើនសមត្ថភាពយោធារបស់ខ្លួន ផងដែរ។

មិនដូចជំនួយយោធាពីមុនៗទេ កញ្ចប់ចុងក្រោយបង្អស់នេះ គឺជាផ្នែកមួយនៃសិទ្ធិអំណាចប្រធានាធិបតី ដែលត្រូវបានអនុម័តដោយសភាអាមេរិកកាលពីឆ្នាំមុន ដែលនេះមានន័យថាអាវុធនឹងត្រូវបានយកចេញដោយផ្ទាល់ពីឃ្លាំងរបស់សហរដ្ឋអាមេរិក ដើម្បីពន្លឿនការផ្គត់ផ្គង់៕

ប្រែសម្រួល៖ Vann Vann

ប្រភព៖ RT

ចុចអាន៖ តៃវ៉ាន់ គំរាមបាញ់នាវាចម្បាំង និងយន្តហោះរបស់ ចិន