លោក Zelensky ប្រាប់ឈ្មោះប្រទេសដែលនឹងរៀបចំកិច្ចប្រជុំពិភាក្សាការ​អនុវត្ត “រូបមន្តសន្តិភាពអ៊ុយក្រែន”

ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃអាទិត្យថា កិច្ចប្រជុំបន្ទាប់ដើម្បីពិភាក្សាអំពីការអនុវត្ត “រូបមន្តសន្តិភាពអ៊ុយក្រែន” សម្រាប់ការបញ្ចប់សង្រ្គាមលុកលុយរបស់រុស្ស៊ី នឹងធ្វើឡើងនៅក្នុងប្រទេសអារ៉ាប៊ីសាអូឌីត ។

ស្របពេលជាមួយគ្នានេះ អគ្គសេនាធិការចម្រុះរបស់លោក Zelensky គឺលោក Andriy Yermak ក៏បាននិយាយនៅលើបណ្ដាញ Twitter ផងដែរថា “យើងកំពុងរៀបចំកិច្ចប្រជុំទីប្រឹក្សាសន្តិសុខជាតិទាក់ទងនឹងការអនុវត្ត “រូបមន្តសន្តិភាពអ៊ុយក្រែន” ដែលនឹងប្រព្រឹត្តទៅក្នុងពេលឆាប់ៗនេះនៅអារ៉ាប៊ីសាអូឌីត ហើយវា​ជា​ចំណុច​មួយ​នៃ​សុន្ទរកថា​របស់​លោក Zelensky ​នៅ​ឯសមាជ​នៃ​អាជ្ញាធរ​ថ្នាក់មូលដ្ឋាន និង​ថ្នាក់តំបន់ដែលស្ថិត​ក្រោម​ប្រធានាធិបតីអ៊ុយក្រែន” ។

ទន្ទឹមនោះ ដោយសំដៅលើកិច្ចប្រជុំលើកដំបូងក្នុងកម្រិតទីប្រឹក្សាសន្តិសុខជាតិរហូតដល់ប្រមុខរដ្ឋ ដែលបានធ្វើឡើងកាលពីខែមិថុនាក្នុងរដ្ឋធានី Copenhagen របស់ប្រទេសដាណឺម៉ាក, លោក Yermak បានលើកឡើងថា “ឥឡូវនេះរដ្ឋាភិបាលទីក្រុងកៀវកំពុងខិតខំប្រឹងប្រែងដើម្បីចូលរួមជាមួយដៃគូលោកខាងលិចឲ្យបានច្រើនតាមដែលអាចធ្វើទៅបាន ជាពិសេសអ៊ុយក្រែននឹងចូលដៃជាមួយពិភពលោកខាងត្បូងដើម្បីស្វែងរក​កិច្ចចរចា​រកសន្តិភាពផងដែរ ។

ពាក់ព័ន្ធនឹងកិច្ចចរចារកសន្តិភាពនេះដែរ រដ្ឋបាលរបស់លោក Zelensky ធ្លាប់បានបោះបង់ចោលជាច្រើនលើកច្រើនសារមកហើយ ដោយសារតែមានការរារាំងពីសំណាក់បងធំអាមេរិក ជាពិសេសប្រធានាធិបតីអ៊ុយក្រែនរូបនេះថែមទាំងចេញច្បាប់ហាមឃាត់មិនឲ្យអាជ្ញាធរអ៊ុយក្រែនផ្សេងទៀតចូលរួមក្នុងកិច្ចចរចាជាមួយរុស្ស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ក្រោយលោក Zelensky ថា សង្រ្គាមវិលត្រលប់ទៅរុស្ស៊ីវិញ ស្រាប់តែលោក Medvedev គំរាមបាញ់នុយក្លេអ៊ែរ