ចាប់ពីល្ងាចថ្ងៃនេះទៅ ប្រជាជន កម្ពុជា នឹងមើលឃើញព្រះចន្ទពេញវង់ធំបំផុតមួយ ប្រចាំឆ្នាំ២០២៣

ចាប់ពីល្ងាចថ្ងៃអង្គារ ទី០១ ខែសីហា ឆ្នាំ២០២៣ នេះ ប្រជាជនកម្ពុជាទូទាំងប្រទេសអាចមើលឃើញព្រះចន្ទពេញវង់ធំបំផុតមួយ ក្នុងចំណោមព្រះចន្ទធំៗទាំង ៤ ប្រចាំឆ្នាំ២០២៣ ដែលមានឈ្មោះថា “Full Sturgeon Moon” ជាឈ្មោះព្រះចន្ទពេញវង់តំណាងឱ្យខែសីហា។

ព្រះចន្ទពេញវង់ “Sturgeon” តែងតែកើតឡើងក្នុងខែសីហាជារៀងរាល់ឆ្នាំ ស្របពេលដែលឆ្នាំ២០២៣នេះ វាមានវត្តមានប៉ះចំថ្ងៃទី០១ ។ ឈ្មោះនេះត្រូវបានយកតាមឈ្មោះត្រី Sturgeon នៃ​កុលសម្ព័ន្ធ​ភាគខាងជើងសហរដ្ឋអាមេរិក។ កុលសម្ព័ន្ធ​មួយ​ចំនួន​បាន​ឲ្យ​ឈ្មោះវា​ថា ព្រះចន្ទ​ពេញ​វង់​ក្រហម ពីព្រោះ​នៅពេលដែលព្រះចន្ទរះឡើង វាលេចចេញជាពណ៌​ក្រហមតាមរយៈអ័ព្ទ ហើយក្រៅពីនោះ​គេហៅវាថា ព្រះចន្ទ Green Corn ឬ ព្រះចន្ទ Grain ។

ជាទូទៅព្រះចន្ទ “Sturgeon” នឹងចាប់ផ្ដើមមើលឃើញនៅថ្ងៃទី០១ ខែសីហា ចន្លោះម៉ោង ៦ល្ងាច រហូតដល់ម៉ោង ៦ព្រឹក។ ចំពោះប្រទេសកម្ពុជាអាចនឹងមើលឃើញ “Sturgeon” នៅអំឡុងម៉ោង ៧ និង ១៤ នាទីយប់ នៅថ្ងៃទី០១ ខែសីហានេះតែម្ដង ។ ធម្មតាព្រះចន្ទ “Sturgeon” មានចម្ងាយពីផែនដីប្រមាណ ៣៥៧,៥៣០ គីឡូម៉ែត្រ ខណៈនៅយប់ស្អែកវាខិតមកជិតផែនដីជាងមុន ក្នុងចម្ងាយប្រមាណ ៣៥៧,៣៤៤ គីឡូម៉ែត្រ ខណៈដោយសារតែមូលហេតុនេះហើយ ទើបមនុស្សម្នាអាចមើលឃើញទំហំដ៏ធំរបស់វា ។

ទោះជាយ៉ាងណា ក្រៅពីប្រទេសកម្ពុជា បណ្ដាប្រទេសមួយចំនួនទៀត ពុំអាចមើលឃើញព្រះចន្ទ “Sturgeon” នៅថ្ងៃទី០១ នោះទេ ដោយអាចមើលឃើញនៅថ្ងៃទី០២ ខែសីហាវិញ ៕

ប្រែសម្រួល៖ សន្យា

ប្រភព៖ Space

ចុចអាន៖ ឈ្មោះ​ព្រះចន្ទ​ពេញ​បូណ៌មី​តាម​ខែ​នីមួយៗ​​ ដែល​មនុស្ស​ភាគច្រើន​មិន​ធ្លាប់​បាន​ដឹង

ចុចអាន៖ ងូតទឹកកណ្ដាលអធ្រាត្រ ចំយប់ពេញបូណ៌មី ជនជាតិចិនជឿស៊ប់ខ្លាំង