បាក់ដងស្ទូច លើផ្លូវល្បឿនលឿនឥណ្ឌា ស្លាប់មនុស្ស ១៧នាក់

នៅថ្ងៃអង្គារទី១ខែសីហា កម្មករចំនួន១៧នាក់ ត្រូវបាត់បង់ជីវិតនៅភាគខាងលិចប្រទេសឥណ្ឌា ពេលដងស្ទូច បានបាក់លើផ្លូវល្បឿនលឿនដែលកំពុងសាងសង់នៅខាងក្រៅទីក្រុង Mumbai។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងឆ្លើយតបគ្រោះមហន្តរាយជាតិ (NRDF) របស់ប្រទេសឥណ្ឌា បាននិយាយថា ដងស្ទូចបានបាក់លើផ្ទាំងបេតុងធំៗ សង្កត់លើកម្មករដែលកំពុងធ្វើការនៅលើផ្លូវល្បឿនលឿន Samruddhi ក្នុងរដ្ឋ Maharashtra ហើយក្រោយមកសាកសព​ចំនួន១៧នាក់​ត្រូវ​បាន​រក​ឃើញ ខណៈអ្នក​របួស៣នាក់ ​ត្រូវ​គេ​បញ្ជូន​ទៅ​មន្ទីរពេទ្យ។

ទន្ទឹមនោះ លោកនាយករដ្ឋមន្ត្រី Narendra Modi បាននិយាយថា លោកពិតជារន្ធត់ចិត្តចំពោះហេតុការណ៍នេះ ហើយបញ្ជាឲ្យផ្តល់សំណងដល់ក្រុមគ្រួសារកម្មករដែលស្លាប់ និងរបួស។

គួរបញ្ជាក់ថា ឧបទ្ទវហេតុនៅការដ្ឋាន​សំណង់​ហេដ្ឋារចនាសម្ព័ន្ធ​ធំៗ តែងតែកើតមាន​ក្នុង​ប្រទេស​ឥណ្ឌា ខណៈកាលពីខែតុលាឆ្នាំមុន មនុស្សចំនួន១៣០នាក់បានស្លាប់ ក្នុងរដ្ឋ Gujarat នៅពេលស្ពានមួយបានបាក់ភ្លាមៗបន្ទាប់ពីការជួសជុល ហើយក្នុងឆ្នាំ២០១៦ ការបាក់ស្ពានអាកាសនៅលើផ្លូវដ៏មមាញឹកក្នុងទីក្រុង Kolkata បានសម្លាប់មនុស្ស២៦នាក់ផងដែរ ៕

ប្រែសម្រួល៖ Vann Vann

ប្រភព៖ CNA

ចុចអាន៖ ឥណ្ឌា ជួបហេតុការណ៍រន្ធត់មួយទៀត ក្រោយសោកនាដកម្ម រថភ្លើងបុកគ្នា (មានវីដេអូ)