បើជាប់ជានាយករដ្ឋមន្ត្រី បក្សភឿថៃ នឹងលើកយកបញ្ហាចម្បងចំនួន ២ មកដោះស្រាយមុនគេ

បេក្ខជនឈានមុខគេមកពីគណបក្សភឿថៃ លោក ស្រេតថា ថាវីស៊ីន បានដាក់ចេញនូវបញ្ហាអាទិភាពចំនួន ២ ដែលនឹងត្រូវលើកយកមកធ្វើការដោះស្រាយមុនគេ ប្រសិនបើលោកត្រូវបានតែងតាំងជាបេក្ខជនឈរឈ្មោះនាយករដ្ឋមន្ត្រីនៅក្នុងការបោះឆ្នោតជុំបន្ទាប់ដែលគ្រោងធ្វើឡើងនៅថ្ងៃទី៤ ខែសីហានេះ ។

ពាក់ព័ន្ធនឹងបញ្ហានេះ លោក ស្រេតថា បានលើកឡើងថា “បញ្ហាអាទិភាពចម្បងទាំងពីរដែលគណបក្សភឿថៃ នឹងត្រូវយកមកដោះស្រាយនោះ គឺទាក់ទងនឹង សេដ្ឋកិច្ច និងជីវភាពរស់នៅរបស់ប្រជាជន” ។

សេដ្ឋីអចលនទ្រព្យវ័យ ៦០ ឆ្នាំរូបនេះបានបញ្ជាក់ទៀតថា “គណបក្សនឹងធ្វើអ្វីគ្រប់យ៉ាងដើម្បីឲ្យសេដ្ឋកិច្ចថៃប្រសើរឡើងពីមួយកម្រិតទៅមួយកម្រិត ជាពិសេសនឹងធ្វើឲ្យជីវភាពរស់នៅរបស់ប្រជាជនមានអាហារូបត្ថម្ភគ្រប់គ្រាន់ ប្រសិនបើលោកត្រូវបានតែងតាំងជាបេក្ខជននាយករដ្ឋមន្ត្រី” ។

ចំពោះគោលនយោបាយជំរុញសេដ្ឋកិច្ចនេះ បក្សភឿថៃបានដាក់ចេញ និងសន្យារួចមកហើយ ក្នុងអំឡុងពេលយុទ្ធនាការឃោសនាបោះឆ្នោត ហើយគោលការណ៍នោះគឺ គម្រោងផ្ដល់កញ្ចប់លុយឌីជីថលទៅឲ្យប្រជាពលរដ្ឋថៃគ្រប់រូបដែលមានអាយុចាប់ពី ១៦ ឆ្នាំឡើងទៅ ដោយក្នុងម្នាក់ទទួលបានជិត ៣០០ ដុល្លារ ខណៈរដ្ឋាភិបាលនឹងត្រូវចំណាយរហូតដល់ ១៦ ពាន់លានដុល្លារក្នុងមួយឆ្នាំ ។

ទន្ទឹមនោះ គណបក្សភឿថៃនៅតែរក្សាគោលជំហររបស់ខ្លួន មិនធ្វើវិសោធនកម្មមាត្រាទី ១១២ នៃក្រមព្រហ្មទណ្ឌ ឬច្បាប់ប្រមាថព្រះមហាក្សត្រឡើយ ដោយលោក ស្រេតថា អះអាងថា ប្រសិន​បើ​យើង​ចង់​ឲ្យ​ប្រទេសឆ្ពោះទៅ​មុខ និង​បង្កើត​រដ្ឋាភិបាល​ថ្មីបាន គួរតែទុកច្បាប់នេះនៅមួយឡែកសិន ។

គួរបញ្ជាក់ថា គណបក្សភឿថៃនាពេលថ្មីៗនេះបានឈានមុខគេក្នុងការបង្កើតរដ្ឋាភិបាលបន្ទាប់ ក្រោយបក្សចលនាឆ្ពោះទៅមុខបានបាត់បង់ឱកាសមាស បន្ទាប់ពីមេដឹកនាំគណបក្ស និងបេក្ខជននាយករដ្ឋមន្ត្រីតែមួយគត់គឺលោក ភីថា លីមចារើនរ៉ាត់ មិនទទួលបានសំឡេងគាំទ្រគ្រប់គ្រាន់ពីសមាជិកសភាសម្រាប់កៅអីនាយករដ្ឋមន្ត្រីឡើយ ដោយសារតែគោលបំណងចង់កែប្រែច្បាប់ប្រមាថព្រះមហាក្សត្រនេះឯង ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ អ្នកនយោបាយ ថៃ ៣ រូបវិភាគពីការវិលត្រឡប់ចូលស្រុករបស់លោក ថាក់ស៊ីន