រុស្ស៊ី ប្រៀបធៀបការវាយប្រហារដោយដ្រូន អ៊ុយក្រែន លើអគារទីក្រុងមូស្គូ ទៅនឹងព្រឹត្តិការណ៍ ៩/១១ នៅអាមេរិក

អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានប្រាប់ទូរទស្សន៍ Soloviev Live TV ថា សកម្មភាពវាយប្រហារដោយយន្តហោះដ្រូនដែលរដ្ឋាភិបាលទីកៀវ ប្រើប្រាស់ដើម្បីកំណត់គោលដៅលើអគារការិយាល័យក្នុងសង្កាត់ហិរញ្ញវត្ថុនៅទីក្រុងមូស្គូកាលពីថ្ងៃទី៣០ ខែកក្កដា គឺប្រៀបដូចជា ការវាយប្រហារនៅក្នុងព្រឹត្តិការណ៍ថ្ងៃទី១១ ខែកញ្ញា ឆ្នាំ២០០១ លើទីក្រុងញូវយ៉ក ។

លោកស្រី Zakharova បានចង្អុលបង្ហាញថា “សូមក្រឡេកទៅមើលការវាយប្រហារក្នុងព្រឹត្តិការណ៍ ៩/១១ លើអគារភ្លោះក្នុងទីក្រុងញូវយ៉កនៃសហរដ្ឋអាមេរិក ។ វាបានបណ្តាលឲ្យមានអ្នកស្លាប់ និងរបួសយ៉ាងច្រើន ហើយវិធីសាស្រ្តនេះ គឺមិនខុសគ្នាទៅនឹងការវាយប្រហារមកលើអគារការិយាល័យក្នុងទីក្រុងមូស្គូ ដែលជាទីតាំងជនស៊ីវិល និងជាមជ្ឈមណ្ឌលពាណិជ្ជកម្មនោះទេ ហើយឥឡូវនេះយើងកំពុងឃើញរូបភាពដូចគ្នា កំពុងកើតឡើងម្តងទៀតហើយ” ។

ពាក់ព័ន្ធនឹងបញ្ហានេះដែរ អភិបាលក្រុងមូស្គូ លោក Sergey Sobyanin បាននិយាយថា យានគ្មានមនុស្សបើក (UAVs) ជាច្រើនគ្រឿងដែលតម្រង់គោលដៅវាយប្រហារមកលើទីក្រុងមូស្គូ ត្រូវបានបាញ់ទម្លាក់នៅលើផ្លូវហោះហើររបស់វា ប៉ុន្តែទោះជាយ៉ាងណា ដ្រូនមួយគ្រឿងនៅតែអាចគេចផុតពីប្រព័ន្ធខែលការពារដែនអាកាស ហើយឆ្ពោះទៅដល់សង្កាត់ហិរញ្ញវត្ថុរបស់ទីក្រុងមូស្គូ ដោយបានបំផ្លាញផ្នែកខាងមុខនៃអគារនៅជាន់ទី ២១ ។

ទន្ទឹមនោះ ក្នុងការវាយប្រហារនេះ មិនមានណាម្នាក់រងរបួសនោះទេ ប៉ុន្តែកញ្ចក់អគាររងការខូចខាតក្នុងទំហំ ១៥០ ម៉ែត្រការ៉េ ខណៈក្រសួងការពារជាតិរុស្ស៊ីក៏បានបំភ្លឺដែរថា យន្តហោះគ្មានមនុស្សបើករបស់អ៊ុយក្រែនចំនួន ២ គ្រឿងត្រូវបានបាញ់កម្ទេចនៅលើសង្កាត់ Odintsovo និង Naro-Fominsk ចំណែកដ្រូនទី ៣ បានបាត់បង់ម្ចាស់ការ ហើយធ្លាក់នៅខាងក្នុងអគារការិយាល័យមិនមែនលំនៅដ្ឋានមួយកន្លែងក្នុងទីក្រុងមូស្គូ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ថា អាមេរិក នឹងធ្វើឲ្យជម្លោះនៅ អ៊ុយក្រែន កាន់តែរីកធំ ជាពិសេស ពេលបោះឆ្នោតប្រធានាធិបតីឆ្នាំ ២០២៤