ព័ត៌មានអន្ដរជាតិ

នាយករដ្ឋមន្ត្រីកាណាដា Justin Trudeau ប្រកាសបែកភរិយា ក្រោយប្រើជីវិតអាពាហ៍ពិពាហ៍អស់ ១៨ ឆ្នាំ

បានផុស

១ year មុន

នៅ

ថ្ងៃព្រហស្បតិ៍ ៣ សីហា ២០២៣

ដោយ

សារព័ត៌មាន Reuters បានរាយការណ៍ថា នាយករដ្ឋមន្ត្រីកាណាដាលោក Justin Trudeau និងលោកស្រី Sophie Gregoire Trudeau បានប្រកាសពីការបែកគ្នាដោយបញ្ចប់ទំនាក់ទំនងស្នេហារយៈពេល ១៨ ឆ្នាំ ក្រោយរៀបការកាលពីខែឧសភា ឆ្នាំ ២០០៥ និងមានកូនបីនាក់ក្នុងបន្ទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ នេះគឺជាប្រវត្តិសាស្ត្រដែលកើតឡើងម្តងទៀតនៅក្នុងគ្រួសារដូចដែលឪពុករបស់គាត់ Pierre Trudeau អតីតនាយករដ្ឋមន្ត្រីកាណាដាបានលែងលះជាមួយអតីតភរិយា Margaret ក្នុងឆ្នាំ ១៩៧៧ ពេលកំពុងកាន់តំណែងដូចគ្នា។

ជាក់ស្ដែង លោក Justin Trudeau បានក្លាយជានាយករដ្ឋមន្ត្រីនៅអាយុ ៤៣ ឆ្នាំក្នុងឆ្នាំ២០១៥ ហើយគ្រួសារ Trudeau បានទាក់ទាញការចាប់អារម្មណ៍ពីប្រព័ន្ធផ្សព្វផ្សាយជុំវិញពិភពលោក។ ក្នុងរយៈពេលដំបូងដែលនាយករដ្ឋមន្ត្រីរូបនេះឡើងកាន់តំណែងជាមេដឹកនាំកាណាដា គាត់និងភរិយាបង្ហាញខ្លួនជាមួយគ្នាក្នុងព្រឹត្តិការណ៍សង្គម និងបេសកកម្មនៅបរទេសញឹកញាប់។

លើសពីនេះទៀតដែរ ទស្សនាវដ្ដី Vogue កាលពីខែមករាឆ្នាំ ២០១៦ បានបោះពុម្ពអត្ថបទវែងមួយអំពីជីវិតស្នេហារបស់ពួកគេខណៈលោក Trudeau បង្ហើបថាគាត់ “បានធ្វើឲ្យមនុស្សមួយចំនួនភ្ញាក់ផ្អើលដោយការបង្ហាញក្តីស្រលាញ់របស់ភរិយាជាសាធារណៈ”។

ទោះជាយ៉ាងណាក៏ដោយ នាយករដ្ឋមន្ត្រី Trudeau បានលាតត្រដាងយ៉ាងច្បាស់មុនពេលក្លាយជាមេដឹកនាំប្រទេសកាណាដា។ អ្នកទាំងពីរប្រឈមមុខនឹងបញ្ហាដូចគ្នាក្នុងអាពាហ៍ពិពាហ៍។ គាត់បានប្រាប់ក្រុមហ៊ុន Canadian Broadcasting Corp ក្នុងឆ្នាំ ២០១៤ ថា “អាពាហ៍ពិពាហ៍របស់គាត់មិនល្អឥតខ្ចោះទេ! ហើយក៏មានពេលល្អ និងពេលអាក្រក់ដែរ”។

នាយករដ្ឋមន្ត្រី Trudeau ក៏បានបង្ហោះស្រដៀងគ្នានៅលើ Instagram ថា “Sophie និងខ្ញុំចង់បង្ហាញពីការពិតដែលថាបន្ទាប់ពីការសន្ទនាដ៏មានអត្ថន័យ និងពិបាកជាច្រើន យើងបានសម្រេចចិត្តទៅផ្លូវដាច់ដោយឡែកពីគ្នា” ស្របពេលដែលភរិយារបស់គាត់បានបង្ហោះស្រដៀងគ្នាផងដែរ។

ដោយឡែក យោងតាមសេចក្ដីថ្លែងការណ៍របស់ទីស្តីការនាយករដ្ឋមន្ត្រី ដោយបញ្ជាក់ថា គូស្នេហ៍មួយគូនេះនៅតែផ្ដោតលើការចិញ្ចឹមកូន នៅក្នុងបរិយាកាសសុវត្ថិភាព ពេញដោយសេចក្ដីស្រឡាញ់ និងកិច្ចសហប្រតិបត្តិការ ហើយថាគ្រួសារ Trudeau នឹងនៅតែរួមគ្នាសម្រាប់ថ្ងៃឈប់សម្រាកនៅសប្ដាហ៍ក្រោយ៕