កូនប្រុសលោកស្រី អ៊ុងសាន ស៊ូជី ចេញមុខនិយាយពីការលើកលែងទោស​ដល់ម្ដាយរបស់ខ្លួន

កូនប្រុសរបស់អតីតមេដឹកនាំជាប់ឆ្នោតតាមបែបលទ្ធិប្រជាធិបតេយ្យរបស់មីយ៉ាន់ម៉ាលោកស្រី អ៊ុងសាន ស៊ូជី បាននិយាយថា ការលើកលែងទោសចំនួន ៥ ករណីដល់ម្ដាយរបស់លោកពីសំណាក់យោធាគឺ “គ្មានន័យអ្វីទាល់តែសោះ” ។

លោក គីម អារីស ដែលជាកូនប្រុសពៅរបស់លោកស្រី អ៊ុងសាន ស៊ូជី បាននិយាយក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters នៅទីក្រុងឡុងដ៍ថា “ចំណាត់ការរបស់យោធាមីយ៉ាន់ម៉ា គឺគ្រាន់តែជាការឃោសនានយោបាយប៉ុណ្ណោះ” ។

លោក អារីស លើកឡើងថា “ពិភពលោកទាំងមូលដឹងហើយ យោធាបានលេងហ្គេមទាំងនេះជាមួយនឹងការឃោសនា ដោយព្យាយាមធ្វើឲ្យគេមើលមកខ្លួនឯងថាបន្ទន់ឥរិយាបថជាមុន ដោយសារតែពួកគេត្រូវធ្វើអ្វីមួយដើម្បីព្យាយាមផ្គាប់ចិត្តពិភពលោក ប៉ុន្តែការពិតពួកគេបានកាត់បន្ថយការកាត់ទោសម្តាយរបស់ខ្ញុំត្រឹមតែ ២ ទៅ ៣ ឆ្នាំប៉ុណ្ណោះ ដូច្នេះវាគ្មាន​ន័យ​អ្វី​ទាំង​អស់” ។

យោធាមីយ៉ាន់ម៉ាកាលពីថ្ងៃអង្គារបានប្រកាសលើកលែងទោសចំនួន ៥ ករណីដល់អតីតមេដឹកនាំរដ្ឋាភិបាលស៊ីវិល លោកស្រី អ៊ុងសាន ស៊ូជី ដែលជាប់ចោទក្នុងចំណោមសំណុំរឿងក្ដីក្ដាំសរុប ១៩ ករណី និងកាត់ទោសលោកស្រីឲ្យជាប់ពន្ធនាគារ ៣៣ ឆ្នាំ ។

ទន្ទឹមនោះ ៥ ករណីដែលយោធាមីយ៉ាន់ម៉ាប្រកាសលើកលែងទោសដល់លោកស្រី អ៊ុងសាន ស៊ូជី គឺបន្ថយការជាប់ពន្ធនាគារត្រឹមតែរយៈពេល ៦ ឆ្នាំប៉ុណ្ណោះ ដូច្នេះអតីតមេដឹកនាំរដ្ឋាភិបាលស៊ីវិលវ័យ ៧៨ ឆ្នាំរូបនេះ នឹងនៅជាប់ក្ដីក្ដាំចំនួន ១៤ ករណី ហើយបន្តការចាប់ឃុំខ្លួននៅក្នុងផ្ទះរយៈពេល ២៧ ឆ្នាំទៀត ទើបរួចទោសទាន់អស់ ។

គួររំឭកឡើងវិញថា លោកស្រី អ៊ុងសាន ស៊ូជី ត្រូវបានចាប់ឃុំខ្លួន ចាប់តាំងពីយោធាបានដណ្តើមអំណាចក្នុងរដ្ឋប្រហារកាលពីថ្ងៃទី១ ខែកុម្ភៈ ឆ្នាំ ២០២១ ក្រោមបទចោទប្រកាន់សរុបចំនួន ១៩ ករណី រាប់ចាប់តាំងពីអំពើពុករលួយ រហូតដល់ការបំពានច្បាប់រឹតត្បិតជំងឺកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោកស្រី អ៊ុងសាន ស៊ូជី នៅជាប់ឃុំខ្លួន ២៧ ឆ្នាំទៀត ទើបរួចទោសអស់