ដូណាល់ ត្រាំ ប្តេជ្ញាកាត់ទោស ចូ បៃដិន ប្រសិនបើជាប់ឆ្នោត

បេក្ខជនប្រធានាធិបតីឈានមុខខាងគណបក្សសាធារណរដ្ឋលោក ដូណាល់ ត្រាំ បានប្រាប់ទស្សនិកជននៅរដ្ឋ Alabama កាលពីចុងសប្តាហ៍ថា ប្រសិនបើគាត់ឈ្នះឆ្នោតក្នុងឆ្នាំ២០២៤មែន គាត់នឹងតែងតាំងរដ្ឋអាជ្ញាពិសេសមួយ ដើម្បីស៊ើបអង្កេតអំពើខុសច្បាប់របស់គ្រួសារលោក ចូ បៃដិន នៅថ្ងៃដំបូងនៃការចូលកាន់តំណែង តែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ដែលត្រូវបានចោទប្រកាន់ចំនួនបីដងរួចមកហើយ ក្នុងរយៈពេល៤ខែចុងក្រោយ ចំពេលមានការស៊ើបអង្កេតឧក្រិដ្ឋកម្មជាច្រើនករណីលើការប្រព្រឹត្តរបស់គាត់នោះ បានប្រាប់អ្នកទស្សនា នៅឯព្រឹត្តិការណ៍រៃអង្គាសប្រាក់ក្នុងទីក្រុង Montgomery ថា “នៅថ្ងៃបោះឆ្នោតឆ្នាំ២០២៤ យើងនឹងបណ្តេញ ចូ បៃដិន ចេញពីសេតវិមាន។ យើង​នឹង​បណ្តេញ​ឧក្រិដ្ឋជន និង​ចោរ​ចេញពី​សាល​អំណាច​ក្នុង​ទីក្រុង​វ៉ាស៊ីនតោន​”។

អតីតប្រធានាធិបតីអាមេរិករូបនេះ បន្ថែមថា រដ្ឋអាជ្ញាពិសេសមួយ នឹងត្រូវបានតែងតាំងនៅ ថ្ងៃដំបូងដែលគាត់ចូលកាន់តំណែង។ រដ្ឋអាជ្ញាពិសេសនោះ នឹងសិក្សារាល់ការអះអាងសំខាន់ៗ ដែលសភាបង្ហាញ ទាក់ទងនឹងអំពើឆបោកទាំងអស់ រួមទាំងសំណូកពីប្រទេសចិន និងប្រទេសក្រៅជាច្រើនទៀត ​ដែលពាក់ព័ន្ធ​ទ្រព្យ​សម្បត្តិ​របស់​គ្រួសារ​ឧក្រិដ្ឋកម្ម បៃដិន ផងដែរ។

លោក ត្រាំ បានអះអាងបែបនេះ មួយថ្ងៃបន្ទាប់ពីមិនសារភាពទោសកំហុស ចំពោះបទចោទប្រកាន់ផ្សេងៗ ដែលលើកឡើងដោយទីប្រឹក្សាពិសេសលោក Jack Smith ជាផ្នែកមួយនៃការស៊ើបអង្កេត ទាក់ទិនកុបកម្មកាលពីថ្ងៃទី៦ខែមករាឆ្នាំ២០២១ នៅវិមានកាពីតូល ក្នុងទីក្រុងវ៉ាស៊ីនតោន ឌី.ស៊ី។

ក្នុងពេលដំណាលគ្នានោះ បុរសអាយុ៧៧ឆ្នាំរូបនេះ ក៏ប្រឈមមុខនឹងការស៊ើបអង្កេត ទាក់ទងការចោទប្រកាន់ថា គាត់បានរក្សាទុកឯកសារសម្ងាត់ នៅឯអចលនទ្រព្យ Florida និងរារាំងកិច្ចខិតខំប្រឹងប្រែងរបស់រដ្ឋាភិបាលដើម្បីរកឯកសារទាំងនោះផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ត្រាំ មិនទទួលស្គាល់ទោសកំហុស ហើយថា បទចោទប្រកាន់ គឺជាការធ្វើទុក្ខបុកម្នេញ ពីគូប្រជែងនយោបាយ