អាមេរិក គាំទ្រ ហ្វីលីពីន សម្រាប់ការថ្កោលទោសលើសកម្មភាពដ៏គ្រោះថ្នាក់​របស់ ចិន នៅដែនទឹកមានជម្លោះ

អ្នកនាំពាក្យក្រសួងការពារជាតិសហរដ្ឋអាមេរិកលោក Patrick Ryder បាននិយាយកាលពីថ្ងៃអាទិត្យថា មន្ទីរបញ្ចកោណបានចូលរួមជាមួយហ្វីលីពីនក្នុងការថ្កោលទោសលើឆ្មាំឆ្នេរសមុទ្ររបស់ចិនចំពោះការប្រើប្រាស់កាណុងបាញ់ទឹកដាក់លើនាវាហ្វីលីពីននៅជិតដែលទឹកមានជម្លោះក្នុងសមុទ្រចិនខាងត្បូង ។

លោក Ryder បានសរសេរបង្ហោះនៅលើបណ្ដាញ X ជាវេទិកាប្រព័ន្ធផ្សព្វផ្សាយសង្គមដែលពីមុនត្រូវបានគេស្គាល់ជា Twitter ថា “យើងឈរជាមួយសម្ព័ន្ធមិត្តហ្វីលីពីនរបស់យើង ក្នុងការថ្កោលទោសកិច្ចខិតខំប្រឹងប្រែងរបស់ចិនដើម្បីរារាំងប្រតិបត្តិការស្របច្បាប់នៅក្បែរតំបន់ថ្មប៉ប្រះទឹក Second Thomas Shoal” ។

កាលពីថ្ងៃអាទិត្យ ឆ្មាំឆ្នេរសមុទ្រហ្វីលីពីនបានថ្កោលទោសយ៉ាងខ្លាំងលើសកម្មភាពដ៏គ្រោះថ្នាក់ និងការប្រើប្រាស់កាណុងបាញ់ទឹកខុសច្បាប់របស់ឆ្មាំឆ្នេរសមុទ្រចិនមកលើនាវាហ្វីលីពីននៅជិតតំបន់ថ្មប៉ប្រះទឹក Second Thomas Shoal ដែលទីក្រុងម៉ានីលហៅថា Ayungin Shoal ។

ទន្ទឹមនោះ ឆ្មាំសមុទ្រចិនបានធ្វើការតបតវិញថា សកម្មភាពបាញ់កាណុងទឹកដាក់នាវាហ្វីលីពីន គឺដោយសារតែទូកដឹកទំនិញចំនួន ២ គ្រឿង និងនាវាឆ្មាំឆ្នេរសមុទ្រហ្វីលីពីន ២ គ្រឿងបានចូលដែនទឹកនៃប្រជុំកោះ Spratly របស់ចិនដោយមិនមានការអនុញ្ញាត ដូច្នេះចិនមានអធិបតេយ្យភាពមិនអាចប្រកែកបានលើប្រជុំកោះមួយនេះ និងដែនទឹកជុំវិញនោះ ។

គួរបញ្ជាក់ថា តំបន់ថ្មប៉ប្រះទឹក Second Thomas Shoal ដែលចិនហៅថាជា Ren’ai Jiao និង Ayungin Shoal ក្នុងប្រទេសហ្វីលីពីន គឺជាផ្នែកមួយនៃប្រជុំកោះ Spratly ដែលមានជម្លោះ ហើយក៏ជាប្រជុំកោះដ៏សំខាន់ដែលចិន និងប្រទេសអាស៊ីមួយចំនួនទៀត បានទាមទារមកធ្វើជាចំណែកអធិតេយ្យរៀងៗខ្លួនផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន-រុស្ស៊ី ធ្វើសមយុទ្ធរួមគ្នាជិតរដ្ឋ Alaska ខណៈអាមេរិក នៅមិនសុខ បញ្ជូននាវាទៅឆ្លើយតប