ព័ត៌មានអន្ដរជាតិ

លោក ប្រាយុទ្ធ ប្ដេជ្ញាថា យោធានឹងនៅតែការពារប្រទេស ថៃ

បានផុស

២ years មុន

នៅ

ថ្ងៃចន្ទ ៧ សីហា ២០២៣

ដោយ

នៅពេលអ្នកសារព័ត៌មានសួរនាំអំពីស្ថានភាពយោធា ចំពេលមានភាពតានតឹងផ្នែកនយោបាយកំពុងកើនឡើងខ្លាំងនោះ នាយករដ្ឋមន្ត្រីផុតអាណត្តិលោក ប្រាយុទ្ធ ចាន់អូចា បានលើកឡើងកាលពីពេលថ្មីៗនេះថា កងកម្លាំងប្រដាប់អាវុធនឹងនៅតែបន្តការការពារប្រទេសថៃដដែល ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្ននៅក្នុងប្រទេសថៃកំពុងប្រឈមមុខនឹងការកើនឡើងភាពតានតឹងផ្នែកនយោបាយ ខណៈការប៉ុនប៉ងបង្កើតរដ្ឋាភិបាលថ្មីរបស់បក្សឈ្នះឆ្នោតបានអូសបន្លាយរយៈពេលជិត ៣ ខែមកហើយ ចាប់តាំងពីការបោះឆ្នោតថ្ងៃទី១៤ ខែឧសភា ហើយក៏មានការភ័យខ្លាចផងដែរចំពោះការផ្ទុះជម្លោះណាមួយរវាងក្រុមគាំទ្រលទ្ធិប្រជាធិបតេយ្យ និងអ្នកគាំទ្រយោធា ហើយនៅពេលនោះ យោធាអាចនឹងធ្វើអន្តរាគមន៍ដើម្បីទប់ស្កាត់រឿងរ៉ាវនេះភ្លាមៗ ។

ទន្ទឹមនោះ អ្នកសារព័ត៌មានបានចាក់សួរទៀតថាតើលោកមានការព្រួយបារម្ភអំពីអនាគតនៃកងកម្លាំងប្រដាប់អាវុធដែរឬទេ ចំពេលមានវិបត្តិនយោបាយនាពេលថ្មីៗនេះ? លោក ប្រាយុទ្ធ បញ្ជាក់ថា “ដរាបណានៅមានទាហានវ័យក្មេងនៅក្នុងជួរកងទ័ព និងមានច្បាប់ការពារពីសារៈសំខាន់នៃកងកម្លាំងប្រដាប់អាវុធនោះ គ្មានអ្វីដែលលោកត្រូវព្រួយបារម្ភនោះទេ ហើយកងកម្លាំងប្រដាប់អាវុធមិនត្រូវបានទុកចោលឲ្យធ្វើការតែឯងនោះទេ” ។

ស្របពេលជាមួយគ្នានេះ លោកឧត្តមសេនីយវ័យ ៦៩ ឆ្នាំដែលជានាយករដ្ឋមន្ត្រីចាំផ្ទះ និងជារដ្ឋមន្ត្រីការពារជាតិរូបនេះ ក៏កំពុងរង់ចាំការប្រគល់អំណាចទៅឲ្យរដ្ឋាភិបាលបន្ទាប់ផងដែរ ក្រោយគណបក្សរបស់លោក និងបក្សសម្ព័ន្ធមិត្តផ្សេងទៀតបានរងបរាជ័យយ៉ាងចាស់ដៃនៅក្នុងការបោះឆ្នោត ។

គួរបញ្ជាក់ថា បើមិនមានអ្វីប្រែប្រួលទេនោះ សម័យប្រជុំរួមគ្នានៃរដ្ឋសភា និងព្រឹទ្ធសភាថៃដើម្បីបោះឆ្នោតជ្រើសរើសនាយករដ្ឋមន្ត្រីទី ៣០ របស់ប្រទេស អាចនឹងប្រព្រឹត្តទៅចន្លោះថ្ងៃទី១៨ ឬថ្ងៃទី១៩ ខែសីហា ពោលរយៈពេល ៣ ថ្ងៃ ក្រោយតុលាការធម្មនុញ្ញធ្វើសេចក្ដីសម្រេចលើញត្តិទាក់ទងនឹងការបន្ត ឬដកសិទ្ធិលើមេដឹកនាំចលនាឆ្ពោះទៅមុខ លោក Pita Limjaroenrat ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ សភា ថៃ ប្រកាសថ្ងៃបោះឆ្នោតជ្រើសរើសនាយករដ្ឋមន្ត្រីជុំបន្ទាប់