Elon Musk ថា ការប្រកួតវាយក្នុងទ្រុងជាមួយ Mark Zuckerberg នឹងផ្សាយ​ផ្ទាល់តាមបណ្តាញសង្គម X

យោងតាមការបញ្ជាក់ពីមហាសេដ្ឋី Elon Musk បានឲ្យដឹងថា ការប្រកួ​តក្នុងទ្រុងរវាង​លោកជាមួយមេក្រុមហ៊ុន Meta លោក Mark Zuckerberg ​នឹងត្រូវផ្សាយផ្ទាល់នៅលើបណ្តាញសង្គម X ។

កាលពីព្រឹកថ្ងៃអាទិត្យ ​លោក Elon Musk បានបញ្ចេញសារមួយថា លោកបានធ្វើទម្ងន់ជារៀងរាល់ថ្ងៃ ដើម្បីត្រៀមសម្រាប់ការប្រកួតដែលនឹងមកដល់នាពេលខាងមុខនេះ ហើយប្រាក់ចំណូលទាំងអស់ លោកនឹងផ្តល់បង្វែរទៅជាសប្បុរសធម៌សម្រាប់អតីតយុទ្ធជន ។

ដោយមិនចាំយូរ​ឡើយនៅថ្ងៃដដែលនោះ មហាសេដ្ឋី Mark Zuckerberg បានឆ្លើយតបទៅវិញតាមរយៈបណ្ដាញសង្គម Threads ថា “តើយើងគួរតែប្រើវេទិកាដែលអាចទុកចិត្តបានជាងនេះដែរឬទេ ដើម្បីរៃអង្គាសប្រាក់សម្រាប់សប្បុរសធម៌?” ។

ម្ចាស់ Facebook រូបនេះបានបន្ថែមទៀតថា លោកបានត្រៀមខ្លួនរួចរាល់អស់ហើយសម្រាប់ការប្រកួតមួយនេះ ហើយមិនតែប៉ុណ្ណោះ លោកក៏បានស្នើប្រកួតគ្នានៅថ្ងៃ​២៦ ខែសីហា​ខាងមុខនេះតែម្ដង ប៉ុន្តែភាគីខាងលោក Elon Musk មិនទាន់មានការបញ្ជាក់ពីរឿងរ៉ាវនេះនៅឡើយទេ ។

គួរបញ្ជាក់ថា រឿងរ៉ាវប្រកួតក្នុងទ្រុងរវាងមហាសេដ្ឋីបច្ចេកវិទ្យាយក្សរបស់សហរដ្ឋអាមេរិកទាំងពីរ កំពុងធ្វើឲ្យប្រិយមិត្តអន្ទះសារ​រង់ចាំទស្សនាព្រឹត្តិការណ៍មួយនេះជាខ្លាំង ​ខណៈអ្នកទាំងពីរ​នៅតែ​បន្តឌឺដងគ្នា​ទៅវិញទៅមក​នៅលើបណ្តាញសង្គមថ្មីរបស់ពួកគេរៀងៗខ្លួន ៕

ប្រែសម្រួល៖ នាង រតនៈ

ប្រភព៖​ CNN