មកដឹងអាយុថ្នាក់ដឹកនាំប្រទេស អាស៊ាន ទាំង ១០ ខណៈឯកឧត្តមបណ្ឌិត ហ៊ុន ម៉ាណែត មានវ័យក្មេងជាងគេ

បន្ទាប់ពីព្រះមហាក្សត្រនៃព្រះរាជាណាចក្រកម្ពុជាចេញព្រះរាជក្រឹត្យត្រាស់បង្គាប់ចាត់តាំងឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីនៃកម្ពុជាកាលពីថ្ងៃចន្ទ ទី៧ ខែសីហា, ឯកឧត្តមបណ្ឌិតត្រូវបានចាត់ទុកថាជាថ្នាក់ដឹកនាំប្រទេសមួយរូបដែលមានវ័យតិចជាងគេបង្អស់ ក្នុងចំណោមមេដឹកនាំនៃប្រជាជាតិអាស៊ីអាគ្នេយ៍ ឬហៅកាត់ថា អាស៊ាន ។

ខាងក្រោមនេះគឺជាបញ្ជីឈ្មោះ និងអាយុរបស់ថ្នាក់ដឹកនាំកំពូលនៃប្រទេសអាស៊ានទាំង ១០ ៖

១. ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា

ឯកឧត្តមបណ្ឌិត ហ៊ុន ម៉ាណែត កើតនៅថ្ងៃទី២០ ខែតុលា ឆ្នាំ១៩៧៧ បច្ចុប្បន្ននាយករដ្ឋមន្ត្រីរបស់ព្រះរាជាណាចក្រកម្ពុជា ដែលនឹងចូលកាន់តំណែងជាផ្លូវការនៅថ្ងៃទី២២ ខែសីហា ឆ្នាំ២០២៣ ខាងមុខនេះមានវ័យ ៤៦ ឆ្នាំ ។

២. លោក Vo Van Thuong ប្រធានាធិបតីវៀតណាម

លោក Vo Van Thuong កើតនៅថ្ងៃទី១៣ ខែធ្នូ ឆ្នាំ១៩៧០ បច្ចុប្បន្នលោកមានវ័យ ៥២ ឆ្នាំ ។ លោក Vo Van Thuong បានចូលកាន់តំណែងជាប្រធានាធិបតីវៀតណាមកាលពីថ្ងៃទី២ ខែមីនា ឆ្នាំ២០២៣ នេះ ។

៣. លោក Joko Widodo ប្រធានាធិបតីឥណ្ឌូណេស៊ី

លោក Joko Widodo កើតនៅថ្ងៃទី២១ ខែមិថុនា ឆ្នាំ១៩៦១ បច្ចុប្បន្នលោកមានវ័យ ៦២ ឆ្នាំ ។ លោក Joko Widodo ឡើងកាន់តំណែងជាប្រធានាធិបតីឥណ្ឌូណេស៊ីកាលពីថ្ងៃ២០ ខែតុលា ឆ្នាំ២០១៤ ។

៤. លោក Ferdinand Marcos Jr ប្រធានាធិបតីហ្វីលីពីន

លោក Ferdinand Marcos Jr កើតនៅថ្ងៃទី១៣ ខែកញ្ញា ឆ្នាំ១៩៥៧ បច្ចុប្បន្នលោកមានវ័យ ៦៥ ឆ្នាំ ។ លោក Ferdinand Marcos Jr កាន់កាប់តំណែងប្រធានាធិបតីហ្វីលីពីនកាលពីថ្ងៃទី២០ ខែមិថុនា ឆ្នាំ២០២២ ។

៥. លោក Min Aung Hlaing មេដឹកនាំយោធាមីយ៉ាន់ម៉ា

លោក Min Aung Hlaing កើតនៅថ្ងៃទី៣ ខែកក្កដា ឆ្នាំ១៩៥៦ ។ មេដឹកនាំយោធាមីយ៉ាន់ម៉ារូបនេះមានវ័យ ៦៧ ឆ្នាំ ហើយលោកបានឡើងកាន់អំណាច ក្រោយធ្វើរដ្ឋប្រហារយោធាថ្ងៃទី១ ខែកុម្ភៈ ឆ្នាំ២០២១ ។

៦. លោក Prayut Chan O Cha នាយករដ្ឋមន្ត្រីផុតអាណត្តិថៃ

លោក Prayut Chan O Cha កើតនៅថ្ងៃទី២១ ខែមីនា ឆ្នាំ១៩៥៤ បច្ចុប្បន្ននាយករដ្ឋមន្ត្រីផុតអាណត្តិរបស់ថៃរូបនេះមានវ័យ ៦៩ ឆ្នាំ ។ លោក Prayut បានឡើងកាន់អំណាច ក្រោយធ្វើរដ្ឋប្រហារយោធាកាលពីថ្ងៃទី២២ ខែឧសភា ឆ្នាំ២០១៤ ។

៧. លោក Lee Hsien Loong នាយករដ្ឋមន្ត្រីសិង្ហបុរី

លោក Lee Hsien Loong កើតនៅថ្ងៃទី១០ ខែកុម្ភៈ ឆ្នាំ១៩៥២ ។ លោក Lee Hsien Loong ដែលចូលកាន់តំណែងជានាយករដ្ឋមន្ត្រីសិង្ហបុរីកាលពីថ្ងៃទី៧ ខែវិច្ឆិកា ឆ្នាំ២០០៤ បច្ចុប្បន្ននេះមានវ័យ ៧១ ឆ្នាំ ។

៨. លោក Anwar bin Ibrahim នាយករដ្ឋមន្ត្រីម៉ាឡេស៊ី

លោក Anwar bin Ibrahim កើតនៅថ្ងៃទី១០ ខែសីហា ឆ្នាំ១៩៤៧ បច្ចុប្បន្ននាយករដ្ឋមន្ត្រីម៉ាឡេស៊ីរូបនេះមានវ័យ ៧៥ ឆ្នាំ ។ លោក Anwar ចូលកាន់តំណែងជានាយករដ្ឋមន្ត្រី ២ លើកមកហើយ លើកដំបូងនៅថ្ងៃទី១៨ ខែឧសភា ឆ្នាំ២០២០ ខណៈលើកទី ២ លោកកាន់កាប់តំណែងមួយនេះកាលពីថ្ងៃទី២៤ ខែវិច្ឆិកា ឆ្នាំ២០២២ ។

៩. ព្រះចៅស៊ុងតង់ព្រុយណេ Haji Hassanal Bolkiah Muizzaddin Waddaulah

ព្រះចៅស៊ុលតង់ Haji Hassanal Bolkiah Muizzaddin Waddaulah ប្រសូតនៅថ្ងៃទី១៥ ខែកក្កដា ឆ្នាំ១៩៤៦ បច្ចុប្បន្នទ្រង់មានព្រះជន្ម ៧៧ ព្រះវស្សា ។ ព្រះអង្គយាងឡើងកាន់កាប់តំណែងជានាយករដ្ឋមន្ត្រីព្រុយណេកាលពីថ្ងៃទី១ ខែមករា ឆ្នាំ១៩៨៤ ហើយទ្រង់បានកាន់កាប់តំណែងមួយនេះរហូតមកដល់បច្ចុប្បន្ន ។

១០. លោក Thongloun Sisoulith ប្រធានាធិបតីឡាវ

លោក Thongloun Sisoulith កើតនៅថ្ងៃទី១០ ខែវិច្ឆិកា ឆ្នាំ១៩៤៥ បច្ចុប្បន្នលោកមានវ័យ ៧៨ ឆ្នាំ ។ លោក Thongloun Sisoulith ចូលកាន់កាន់តំណែងជាប្រធានាធិបតីឡាវកាលពីថ្ងៃ១៥ ខែមករា ឆ្នាំ២០២១ ។

គួរបញ្ជាក់ថា ក្នុងចំណោមថ្នាក់ដឹកនាំកំពូលទាំង ១០ ប្រទេសរបស់អាស៊ានគឺឯកឧត្តមបណ្ឌិត ហ៊ុន ម៉ាណែត មានវ័យក្មេងជាងគេ ពោលមានអាយុ ៤៦ ឆ្នាំ ខណៈប្រធានាធិបតីឡាវមានវ័យចាស់ជាងគេរហូតដល់ ៧៨ ឆ្នាំ ៕

អត្ថបទ ៖ ជីវ័ន្ត

ចុចអាន ៖ លោក Lee Hsien Loong អបអរឯកឧត្តមបណ្ឌិត ហ៊ុន ម៉ាណែត ដែលត្រូវ​បានតែងតាំងជានាយករដ្ឋមន្ត្រីកម្ពុជា