ប្រេសិតអាមេរិក ជួបពិភាក្សាទល់មុខ ជាមួយមេដឹកនាំយោធានីហ្សេ ក្នុងស្ថានភាពដ៏តានតឹង

មន្ត្រីជាន់ខ្ពស់អាមេរិកម្នាក់ បានជួបពិភាក្សាទល់មុខគ្នាជាមួយមេដឹកនាំយោធារបស់ប្រទេសនីហ្សេ បន្ទាប់ពីរដ្ឋប្រហារកាលពីខែមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុរដ្ឋលេខាធិការស្តីទីលោកស្រី Victoria Nuland បានឲ្យដឹងថា ការសន្ទនានេះគឺស្មោះត្រង់បំផុត ប៉ុន្តែតឹងតែងណាស់។

ថ្លែងទៅកាន់អ្នកសារព័ត៌មានពីរដ្ឋធានី នីញ៉ាម៉េ លោកស្រី Nuland និយាយថា នៅក្នុងកិច្ចពិភាក្សាដែលមានរយៈពេលជាងពីរម៉ោង សហរដ្ឋអាមេរិកបានស្នើសុំចូលខ្លួនទៅជួយ ប្រសិនបើអ្នកទទួលខុសត្រូវចំពោះរឿងនេះ មានបំណងវិលត្រលប់ទៅរកការស្តាររដ្ឋធម្មនុញ្ញឡើងវិញ។

ស្របពេលជាមួយគ្នានោះ ទីក្រុងវ៉ាស៊ីនតោន គូសបញ្ជាក់ថា រដ្ឋប្រហារនៅតែអាចបញ្ចប់ដោយវិធីការទូត ហើយលោកប្រធានាធិបតី Mohamed Bazoum នៅតែអាចចូលកាន់តំណែងវិញបាន។

ដោយឡែក បណ្តាប្រទេសនៅអាហ្វ្រិកខាងលិច ក៏គ្រោងនឹងជួបប្រជុំគ្នានៅថ្ងៃព្រហស្បតិ៍ ទី១០ ខែសីហា ដើម្បីពិភាក្សាអំពីវិបត្តិនេះផងដែរ ។

ពាក់ព័ន្ធនឹងបញ្ហានេះដែរ Ecowas ដែលជាប្លុកពាណិជ្ជកម្មនៃរដ្ឋចំនួន ១៥ ក្នុងតំបន់អាហ្វ្រិកខាងលិច ក៏បានដាក់ចេញកាលបរិច្ឆេទកំណត់កាលពីថ្ងៃអាទិត្យទី៦ខែសីហា ដល់មេដឹកនាំយោធានីហ្សេ ឲ្យចុះចេញនិងស្តារប្រធានាធិបតីជាប់ឆ្នោតឡើងវិញ ។

ទោះបីជាយ៉ាងណាក៏ដោយ មេដឹកនាំរដ្ឋប្រហារបានឆ្លើយតបទៅនឹងការគំរាមកំហែងនៃសកម្មភាពយោធាពីប្លុកនេះ ដោយបិទដែនអាកាសរបស់នីហ្សេតែម្ដង ៕

ប្រែសម្រួល៖ Vann Vann

ប្រភព៖ BBC

ចុចអាន៖ នីហ្សេ បិទដែនអាកាស ចំពេលមានការគំរាម ធ្វើអន្តរាគមន៍យោធា