ការស្ទង់មតិ៖ ជនជាតិរុស្ស៊ីពាក់កណ្តាល ជឿថា ប្រទេសពួកគេ គឺជា មហាអំណាចពិភពលោក

យោងតាមការស្ទង់មតិដែលធ្វើឡើងដោយមជ្ឈមណ្ឌលស្រាវជ្រាវមតិសាធារណៈរុស្ស៊ី (VTsIOM) បានបង្ហាញថា ប្រជាជនរុស្ស៊ីកាន់តែច្រើន ជឿថា ប្រទេសរបស់ពួកគេ គឺជាមហាអំណាចមួយរបស់ពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សង្គមវិទូបានស្ទង់មតិមនុស្សប្រហែល ១៦០០ នាក់តាមទូរស័ព្ទកាលពីចុងខែមិថុនា ហើយបានរាយការណ៍ថា ម្នាក់ក្នុងចំណោមអ្នកឆ្លើយសំណួរពីរនាក់ ពោលគឺស្មើ ៥០ ភាគរយបាននិយាយថា ពួកគេចាត់ទុកប្រទេសរុស្ស៊ីជាមហាអំណាចមួយ ខុសពីឆ្នាំ២០២០ ដែលមានត្រឹម ៣៧ ភាគរយ ហើយនៅឆ្នាំ ២០០៣ មានត្រឹមតែ១២ ភាគរយប៉ុណ្ណោះ។

ស្របពេលជាមួយគ្នានោះ ជាងមួយភាគបួននៃអ្នកស្ទង់មតិ ជឿថា ប្រទេសរបស់ពួកគេនឹងក្លាយជាមហាអំណាចលេខមួយ ក្នុងរយៈពេល ១៥ ទៅ ២០ ឆ្នាំខាងមុខ ខណៈ ១៧ ភាគរយមិនយល់ស្របនឹងគំនិតនេះឡើយ ។

របាយការណ៍របស់ VTsIOM ក៏បានកត់សម្គាល់ដែរថា ទស្សនវិស័យអភិវឌ្ឍន៍របស់ប្រទេសកាន់តែមានតម្លាភាព ដោយ ៤៦ ភាគរយនៃស្ទង់មតិបាននិយាយថា រុស្ស៊ីនឹងមានអនាគតល្អទៅតាមព្យាករណ៍ ។

ជាចុងក្រោយការស្ទង់មតិក៏បានបង្ហាញពីការកើនឡើងនៃសុទិដ្ឋិនិយមជារួម អំពីអនាគតរបស់រុស្ស៊ីផងដែរថា អ្នកដែលផ្ដល់ទំនុកចិត្តលើលោកប្រធានាធិបតី វ្ល៉ាឌីមៀរ ពូទីន និងរដ្ឋាភិបាលរបស់គាត់ ក្នុងការដឹកនាំរុស្ស៊ីតាមទិសដៅដ៏ត្រឹមត្រូវ បានកើនឡើងពី៤០ភាគរយទៅ ៥៧ ភាគរយក្នុងរយៈពេលពីរឆ្នាំចុងក្រោយនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ទម្លាយតួលេខ អ្នកចុះឈ្មោះចូលបម្រើកងទ័ព ក្នុងឆ្នាំនេះ