រុស្ស៊ី បាញ់ទម្លាក់ដ្រូន ២គ្រឿង ដែលហោះសំដៅទៅ ទីក្រុងមូស្គូ

យន្តហោះគ្មានមនុស្សបើក (ដ្រូន) ចំនួនពីរគ្រឿង ត្រូវបានបាញ់ទម្លាក់ខណៈធ្វើដំណើរសំដៅទៅទីក្រុងមូស្គូ។ នេះបើតាមការបញ្ជាក់ពីអភិបាលក្រុងលោក Sergey Sobyanin និងក្រសួងការពារជាតិរុស្ស៊ី នៅថ្ងៃពុធទី៩ខែសីហា។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម​មន្ត្រី​ខាងលើ, ការប៉ុនប៉ង​វាយប្រហារ​ភេរវកម្ម​នេះ ​មិន​បណ្តាល​ឲ្យ​មាន​មនុស្ស​ស្លាប់ ឬ​ការបំផ្លិចបំផ្លាញអ្វី​ឡើយ​។

ក្រសួងបាននិយាយនៅក្នុងសេចក្តីថ្លែងការណ៍មួយថា “នៅពេលយប់ ការប៉ុនប៉ងរបស់ទីក្រុងកៀវ ដើម្បីអនុវត្តការវាយប្រហារភេរវកម្មដោយយន្តហោះគ្មានមនុស្សបើក ត្រូវបានរារាំងនៅតំបន់មូស្គូ”។

យោងតាមលោក Sobyanin, ដ្រូនទាំង២គ្រឿង ត្រូវបានបំផ្លាញដោយប្រព័ន្ធការពារដែនអាកាស។ មួយគ្រឿងក្នុងចំណោមនោះ ត្រូវបានបាញ់ទម្លាក់នៅភាគខាងត្បូងរដ្ឋធានី ខណៈមួយគ្រឿងទៀត ត្រូវបានបំផ្លាញនៅលើផ្លូវហាយវេ M1 ដែលតភ្ជាប់ទីក្រុងមូស្គូទៅកាន់ព្រំដែនជាមួយប្រទេសបេឡារុស។

ទោះបីជាយ៉ាងណាក៏ដោយ ក្រុមមន្ត្រី​មិន​បាន​ផ្តល់​ព័ត៌មាន​លម្អិត​បន្ថែម​ទៀត ​អំពី​ឧបទ្ទវហេតុ​នេះ​ទេ ហើយ​ប្រភេទ​យន្តហោះ​ដ្រូន​ដែល​ប្រើ​ ក៏គេនៅ​​មិនទាន់បញ្ជាក់​ច្បាស់ដែរ។

គួរបញ្ជាក់ថា កាល​ពី​ថ្ងៃ​អាទិត្យទី៦ខែសីហា យន្តហោះគ្មានមនុស្សបើកមួយគ្រឿង​ ក៏​ត្រូវ​បាន​បាញ់​ទម្លាក់ផងដែរ ខណៈ​​ព្យាយាម​វាយ​ប្រហារទី​ក្រុងមូស្គូ។

មិនត្រឹមប៉ុណ្ណឹង យន្តហោះគ្មានមនុស្សបើករបស់អ៊ុយក្រែន បានទៅដល់រដ្ឋធានីរុស្ស៊ីកាលពីថ្ងៃទី៣០ខែកក្កដា ហើយម្តងទៀតនៅថ្ងៃទី១ខែសីហា ដែល២លើកនោះ ដ្រូនបានវាយប្រហារតំបន់ហិរញ្ញវត្ថុរបស់ទីក្រុង៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន បញ្ជាឲ្យបង្កើនផលិតយន្តហោះគ្មានមនុស្សបើកវាយប្រហារ ដែលកំពុងប្រើនៅ អ៊ុយក្រែន