បេក្ខជនប្រធានាធិបតី​អេក្វាឌ័រ ត្រូវគេធ្វើឃាត ក្នុងយុទ្ធនាការឃោសនាបោះឆ្នោត

បេក្ខជន​ម្នាក់ ​ដែលឈរឈ្មោះសម្រាប់​ការ​បោះឆ្នោត​ប្រធានាធិបតី​អេក្វាឌ័រនាពេល​ខាង​មុខ ​ត្រូវ​បាន​ខ្មាន់កាំភ្លើង​បាញ់​សម្លាប់ ។លោក Fernando Villavicencio សមាជិកនៃសភាជាតិរបស់ប្រទេសនេះ ត្រូវបានវាយប្រហារ បន្ទាប់ពីព្រឹត្តិការណ៍មួយ ក្នុងទីក្រុង Quito នៅថ្ងៃព្រហស្បតិ៍ ទី១០ ខែសីហា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិកនៃក្រុមយុទ្ធនាការរបស់គាត់ បានប្រាប់ប្រព័ន្ធផ្សព្វផ្សាយក្នុងស្រុកថា លោក Villavicencio ហៀបនឹងចូលក្នុងឡានទៅហើយ ស្រាប់តែមានបុរសម្នាក់ ដើរទៅបាញ់គាត់ចំកណ្តាលក្បាលតែម្តង។

ការស្លាប់នេះ ក៏ត្រូវបានបញ្ជាក់នៅលើប្រព័ន្ធផ្សព្វផ្សាយសង្គម ដោយប្រធានាធិបតីបច្ចុប្បន្ន លោក Guillermo Lasso ផងដែរ។ លោកនិយាយថា លោកតក់ស្លុតចំពោះការធ្វើឃាតនេះ ហើយប្តេជ្ញា ចាប់ខ្លួនជនដៃដល់មកផ្តន្ទាទោសឲ្យទាល់តែបាន។

គួរបញ្ជាក់ថា ការ​បោះឆ្នោត​ប្រធានាធិបតីអេក្វាឌ័រ ​គ្រោង​​ធ្វើ​ឡើង​នៅ​ថ្ងៃ​ទី២០ ខែ​សីហា ខណៈកាលពីពេលថ្មីៗនេះអេក្វាឌ័រ ក៏បានកើតមានអំពើហិង្សាកាន់តែខ្លាំងផងដែរ ដោយសារតែវត្តមានរបស់ក្រុមជួញដូរគ្រឿងញៀន ហើយបញ្ហានេះ គឺជាចំណុចសំខាន់នៅក្នុងយុទ្ធនាការឃោសនាបោះឆ្នោតប្រធានាធិបតី។

ទន្ទឹមនោះ ការធ្វើឃាតបេក្ខជនរូបនេះក៏កើតមានឡើង បន្ទាប់ពីការសម្លាប់អភិបាលក្រុង Manta លោក Agustín Intriago ក្នុងខែកក្កដា និងបេក្ខជនតំណែងអភិបាលក្រុង Puerto López លោក Omar Menéndez ក្នុងខែកុម្ភៈ៕

ប្រែសម្រួល៖ Vann Vann

ប្រភព៖ BBC

ចុចអាន៖ ដឹងហើយ អត្តសញ្ញាណអ្នកទោស ៣៤ នាក់ ក្នុងចំណោម ៦៨ នាក់ ដែលស្លាប់ក្នុងការវាយ ប្រហារ នៅពន្ធនាគារ អេក្វាឌ័រ