ទឹក​ជំនន់​នៅ​​ចិន ប៉ះពាល់ធ្ងន់ដល់ដំណាំ​ស្រូវ និងពោត ជាហេតុបង្កក្តីបារម្ភ អំពីអតិផរណាអាហារពិភពលោក

អាជីវករ និងអ្នកវិភាគបានឲ្យដឹងថា ទឹកជំនន់បានបំផ្លាញដំណាំពោតនិងស្រូវ នៅក្នុងខ្សែក្រវាត់ផលិតគ្រាប់ធញ្ញជាតិភាគខាងជើងដ៏សំខាន់របស់ប្រទេសចិន ខណៈការព្យាករដែលថានឹងមានភ្លៀងធ្លាក់ខ្លាំង ព្រោះតែព្យុះទីហ្វុងមួយទៀតកាន់តែខិតជិតមកដល់នោះ បានគំរាមកំហែងដាក់សម្ពាធបន្ថែមដល់អតិផរណាអាហារពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផលប៉ះពាល់ដល់ដំណាំធញ្ញជាតិរបស់ប្រទេសចិន កើតឡើងខណៈអ្នកប្រើប្រាស់ទូទាំងពិភពលោក ក៏កំពុងប្រឈមមុខនឹងការរឹតបន្តឹងខ្សែសង្វាក់ផ្គត់ផ្គង់ស្បៀងផងដែរ ចំពេលឥណ្ឌាដាក់បម្រាមលើការនាំចេញអង្ករកាលពីខែមុន និងកត្តារំខានដល់ការដឹកជញ្ជូនគ្រាប់ធញ្ញជាតិនៅសមុទ្រខ្មៅ ដែលបណ្តាលមកពីសង្គ្រាមរុស្ស៊ី-អ៊ុយក្រែន។

ពាណិជ្ជករសិង្ហបុរី នៅក្រុមហ៊ុនពាណិជ្ជកម្មគ្រាប់ធញ្ញជាតិចិន បាននិយាយថា “តំបន់លិចទឹកនៅភាគខាងជើង បានបង្ហាញការខាតបង់ទិន្នផលមួយចំនួន។ យើង​នឹង​ឃើញ​រូបភាពកាន់តែ​ច្បាស់​លាស់​អំពី​ទំហំ​នៃ​ការ​ខូច​ខាត ​បន្ទាប់​ពី​ទឹក​ជំនន់​ស្រក​”។

ពីរសប្តាហ៍មុន ភាគខាងជើងប្រទេសចិន បានរងការវាយប្រហារដោយព្យុះទីហ្វុង Doksuri ហើយប៉ុន្មានថ្ងៃទៀត ដំណាំនៅប្រទេសចិន អាចនឹងត្រូវខូចខាតបន្ថែម ដោយសារតែឥទ្ធិពលព្យុះទីហ្វុង Khanun។

ការប៉ាន់ស្មានដំបូងបង្ហាញថា ដំណាំពោតពី៤លានទៅ៥លានតោន ឬស្មើនឹងប្រហែល២ភាគរយនៃទិន្នផលរបស់ប្រទេស ត្រូវរងផលប៉ះពាល់ដោយសារទឹកជំនន់។ លើសពីនេះ ទឹកជំនន់ ក៏ទំនងជាកាត់បន្ថយទិន្នផលស្រូវផងដែរ។

ក្រុមហ៊ុន Fitch Ratings កាលពីថ្ងៃសុក្រ បានគូសបញ្ជាក់ថា ភ្លៀងធ្លាក់ខ្លាំងនៅក្នុងតំបន់ផលិតគ្រាប់ធញ្ញជាតិរបស់ប្រទេសចិន ទំនងជាធ្វើឲ្យតម្លៃអង្ករពិភពលោក កើនឡើង។ តម្លៃ​អង្ករ​បាន​ឡើង​ថ្លៃ​ជាង​២០%​រួច​ទៅ​ហើយ ​ចាប់​តាំង​ពី​ប្រទេស​ឥណ្ឌា​ ​ប្រកាស​ហាម​ឃាត់​ការ​នាំ​ចេញ​។

ទន្ទឹមនោះ យោងតាមក្រសួងកសិកម្មសហរដ្ឋអាមេរិក, ការនាំចូលពោតរបស់ប្រទេសចិន នឹងកើនឡើងដល់កម្រិតខ្ពស់បំផុតមិនធ្លាប់មានសោះ ២៣លានតោនក្នុងឆ្នាំ២០២៣/២៤ ពោលគឺកើនឡើងពី១៨លានតោនកាលពីឆ្នាំមុន៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន រងការវាយប្រហារ ដោយភ្លៀងធ្លាក់ ធ្ងន់ធ្ងរបំផុតមិនធ្លាប់មាន ក្នុងរយៈពេល ១៤០ឆ្នាំ