ឆេះមន្ទីរពេទ្យកូវីដនៅរ៉ូម៉ានី ស្លាប់អ្នកជំងឺ៤នាក់ ជាង១០០នាក់ត្រូវជម្លៀសចេញ

ក្រុមមន្រ្តីនិយាយថា អគ្គិភ័យបានសម្លាប់អ្នកជំងឺ៤នាក់នៅមន្ទីរពេទ្យកូវីដក្នុងរដ្ឋធានី Bucharest របស់ប្រទេសរ៉ូម៉ានីនៅថ្ងៃសុក្រនេះ ហើយមនុស្ស១០២នាក់ផ្សេងទៀតត្រូវបានជម្លៀសចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គិភ័យបានកើតឡើងនៅម៉ោងប្រហែល១០ព្រឹក (ម៉ោងនៅកម្ពុជា) ក្នុងអគារមួយនៃមន្ទីរពេទ្យ Matei Bals។ បន្ទប់ចំនួន៤ត្រូវប៉ះពាល់ហើយរដ្ឋអាជ្ញាកំពុងស៊ើបអង្កេតរកមូលហេតុនៃអគ្គិភ័យនេះ។

អ្នកគ្រប់គ្រងបាននិយាយថា អគារមន្ទីរពេទ្យដែលអគ្គិភ័យឆាបឆេះ ត្រូវបានសាងសង់ឡើងក្នុងឆ្នាំ១៩៥៣ហើយត្រូវបានជួសជុលឡើងវិញទាំងស្រុង។

Matei Bals គឺជាមន្ទីរពេទ្យធំជាងគេបំផុតមួយនិងត្រូវបានប្រើដើម្បីព្យាបាលអ្នកជំងឺកូវីដនៅក្នុងប្រទេស។

អ្នកគ្រប់គ្រងមន្ទីរពេទ្យបាននិយាយថា អ្នកជំងឺដែលត្រូវបានជម្លៀសគឺជាអ្នកឆ្លងកូវីដមានអាការៈពីមធ្យមទៅធ្ងន់ធ្ងរ ហើយភាគច្រើនកំពុងដាក់អុកស៊ីហ្សែន។ ប្រហែល៤៤នាក់ក្នុងចំណោមពួកគេ ត្រូវបានបញ្ជូនទៅមន្ទីរពេទ្យកូវីដផ្សេងទៀតនៅទូទាំងទីក្រុង Bucharest ហើយអ្នកជំងឺដែលនៅសេសសល់ ត្រូវបានដាក់នៅអគារផ្សេងទៀតក្នុងមន្ទីរពេទ្យ Matei Bals។

គួរបញ្ជាក់ថា អ្នកជំងឺកូវីដជិត៧,៧០០នាក់ កំពុងសម្រាកព្យាបាលនៅក្នុងមន្ទីរពេទ្យទូទាំងប្រទេសរ៉ូម៉ានីគិតត្រឹមថ្ងៃសុក្រនេះ ដោយក្នុងនោះមាន៩៨៩នាក់ស្ថិតនៅក្នុងបន្ទប់សង្គ្រោះបន្ទាន់។

ប្រទេសនេះបានរាយការណ៍ថាមានករណីឆ្លងកូវីដសរុប ៧២១,៥១៣ករណីនិងស្លាប់១៨,១០៥នាក់៕

ប្រែសម្រួលដោយ៖ Vann Vann

ប្រភព៖ Reuters

ចុចអាន៖ Update៖ អគ្គិភ័យ​នៅ​ទួលស្វាយព្រៃ​ ស្លាប់​កម្មករ ០២​ នាក់ សមត្ថកិច្ចកំពុង​កាយរកសព