ចិន ព្រមានសងសឹកចាស់ដៃ ក្រោយអនុប្រធានាធិបតីតៃវ៉ាន់ ធ្វើ​ទស្សនកិច្ច​ អាមេរិក

ក្រសួងការបរទេសចិន បានថ្កោលទោសដំណើរទស្សនកិច្ចរបស់អនុប្រធានាធិបតីតៃវ៉ាន់លោក William Lai ទៅកាន់សហរដ្ឋអាមេរិក ហើយប្តេជ្ញាថា ខ្លួននឹងចាត់វិធានការសងសឹកផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍មួយកាលពីថ្ងៃអាទិត្យទី១៣ខែសីហា ទីក្រុងប៉េកាំងបានអះអាងសាជាថ្មីនូវការប្រឆាំងរបស់ខ្លួន ចំពោះរាល់ទម្រង់នៃទំនាក់ទំនងការទូតរវាងទីក្រុងវ៉ាស៊ីនតោន និងតៃប៉ិ។

លោក Lai ដែលត្រូវបានគេចាត់ទុកថាជាបេក្ខជនឈានមុខនឹងឈ្នះការបោះឆ្នោតប្រធានាធិបតីតៃវ៉ាន់ក្នុងខែមករាឆ្នាំក្រោយ បានទៅដល់ទីក្រុងញូវយ៉ក កាលពីល្ងាចថ្ងៃសៅរ៍ទី១២ខែសីហា សម្រាប់ការឈប់សំចតមួយរយៈ មុនពេលបន្តដំណើរទៅប៉ារ៉ាហ្គាយ ដើម្បីចូលរួមពិធីសម្ពោធឡើងកាន់តំណែងប្រធានាធិបតីថ្មី របស់ប្រទេសអាមេរិកខាងត្បូងមួយនេះ។

នៅក្នុងសេចក្តីប្រកាសព័ត៌មានដោយអ្នកនាំពាក្យក្រសួងការបរទេសចិនកាលពីថ្ងៃអាទិត្យ, ទីក្រុងប៉េកាំងនិយាយថា ខ្លួនសូមប្រឆាំងដាច់ខាត រាល់ដំណើរទស្សនកិច្ចរបស់អ្នកបំបែកខ្លួន ឯករាជ្យតៃវ៉ាន់ ទៅកាន់សហរដ្ឋអាមេរិកក្នុងនាមណាមួយ ឬក្រោមលេសអ្វីក៏ដោយ។ លោក Lai គឺជាអ្នកបង្កបញ្ហា ហើយថា ដំណើររបស់គាត់ទៅដល់ទឹកដីអាមេរិក គឺជាការបំពានយ៉ាងធ្ងន់ធ្ងរលើគោលការណ៍ចិនតែមួយ និងធ្វើឲ្យខូចដល់អធិបតេយ្យ និងបូរណភាពទឹកដីរបស់ប្រទេសចិន។ 

សេចក្តីប្រកាសព័ត៌មានខាងលើបន្តថា ប្រទេសចិនកំពុងតាមដានយ៉ាងដិតដល់នូវការវិវត្តន៍ ហើយថាវិធានការសងសឹកយ៉ាងចាស់ដៃ នឹងត្រូវធ្វើឡើងដើម្បីការពារផលប្រយោជន៍ជាតិ។

សូមបញ្ជាក់ ដំណើរ​ទស្សនកិច្ច​រយៈពេល​ខ្លី​របស់​លោក Lai ទៅ​កាន់​សហរដ្ឋ​អាមេរិក ​បាន​កើត​ឡើង​ខណៈ​ទីក្រុង​ប៉េកាំង និង​​វ៉ាស៊ីនតោន​ កំពុងព្យាយាម​កែលម្អ​ទំនាក់ទំនង ​បន្ទាប់ពី​មាន​ភាព​តានតឹង​យូរអង្វែង​រវាង​ប្រទេស​ដែលមាន​សេដ្ឋកិច្ច​ធំជាងគេ​ទាំងពីរ៕

ប្រែសម្រួល៖ Vann Vann

ប្រភព៖ RT

ចុចអាន៖ ចិន នឹងរារាំងអនុប្រធានាធិបតីតៃវ៉ាន់ មិនឲ្យទៅសហរដ្ឋអាមេរិក នៅខែក្រោយ