ភាគច្រើននៃអ្នកស្លាប់នៅហាវ៉ៃ ត្រូវបានរកឃើញក្នុងរថយន្ត និងរដូករណែលតាមផ្លូវ

អភិបាលរដ្ឋ ហាវ៉ៃ លោក Josh Green បាននិយាយកាលពីថ្ងៃអង្គារទី១៥ខែសីហាថា ចំនួនមនុស្សស្លាប់ដោយសារភ្លើងឆេះព្រៃនៅកោះ Maui បានកើនឡើងដល់៩៩នាក់ ហើយតួលេខអាចកើនឡើងទ្វេដង នៅសប្តាហ៍ក្រោយ ខណៈមនុស្សប្រមាណ១០០០នាក់ កំពុងបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ លោក Green បានប្រាប់ CNN ថា ភាគច្រើននៃអ្នកស្លាប់ ពោលគឺចំនួន៨០នាក់ដំបូង ត្រូវបានគេរកឃើញក្នុងរថយន្ត នៅតាមផ្លូវ ឬនៅក្នុងទឹករាក់ៗ។

ទោះបីជាយ៉ាងណាក៏ដោយ បើយោងតាមលោក Green បានឲ្យដឹងថា រហូតមកដល់ពេលនេះនៅតែមានបញ្ហាជាមួយបណ្តាញទំនាក់ទំនងលើកោះ ហើយមនុស្សរាប់រយនាក់ដែលអាជ្ញាធរមិនអាចទាក់ទងបាន គឺប្រហែលជាពួកគេបានរត់គេចខ្លួន និងជ្រុះបាត់ទូរស័ព្ទ។

លើសពីនេះ លោកបានសង្កត់ធ្ងន់ថា “យើងបានត្រៀមចិត្តរួចហើយ សម្រាប់រឿងរ៉ាវសោកនាដកម្មជាច្រើនទៀតនាពេលខាងមុខ។ ក្រុមការងារនឹងរកឃើញមនុស្សពី ១០ទៅ២០នាក់ក្នុងមួយថ្ងៃ រហូតដល់ប្រតិបត្តិការត្រូវបញ្ចប់ ហើយវាប្រហែលជានឹងចំណាយពេល១០ថ្ងៃទៀតផងដែរ”។

ក្រុមពន្លត់អគ្គិភ័យនៅកោះ Maui កំពុងបន្តធ្វើការទាំងថ្ងៃទាំងយប់ ដើម្បីទប់ស្កាត់ភ្លើង ដែលឥឡូវនេះ ក្លាយជាភ្លើងឆេះព្រៃសម្លាប់មនុស្សច្រើនបំផុត ក្នុងប្រវត្តិសាស្ត្រអាមេរិកសម័យទំនើប។

ទន្ទឹមនោះ ប្រតិបត្តិការស្វែងរក និងជួយសង្គ្រោះបានជួបប្រទះនូវផលលំបាកយ៉ាងខ្លាំង ហើយក្រុមសង្គ្រោះទើបរុករកក្នុងផ្ទៃដីបានប្រហែល ៣ ភាគរយប៉ុណ្ណោះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ភ្លើងឆេះព្រៃនៅហាវ៉ៃ៖ មនុស្ស១៣០០នាក់បន្តបាត់ខ្លួន ខណៈមួយថ្ងៃ រកឃើញសាកសពពី ១០ទៅ២០ នាក់