បក្សភឿថៃ ដាក់ចេញគោលនយោបាយ ៥ ចំណុច ធ្វើឲ្យពលរដ្ឋក្លាយជា​អ្នកមាន មុនពេលចាស់ជរា

លោកស្រី Linthiporn Varinwatchararoj សមាជិកសភាមកពីគណបក្សភឿថៃបាននិយាយកាលពីថ្ងៃអង្គារថា គណបក្សភឿថៃសន្យានឹងធ្វើឲ្យប្រជាពលរដ្ឋគ្រប់ផ្នែកទាំងអស់របស់សង្គមជាតិក្លាយជាអ្នកមាន មុនពេលអ្នកទាំងនោះឈានដល់វ័យចាស់ជរា ដើម្បីបង្កើនកំណើនសេដ្ឋកិច្ចរបស់ប្រទេសថៃ ។

ពាក់ព័ន្ធនឹងបញ្ហានេះ គណបក្សភឿថៃក៏បានដាក់ចេញនូវគោលនយោបាយចំនួន ៥ ចំណុចផងដែរដើម្បីគាំទ្រ និងការពារកុំឲ្យអ្នកទាំងនោះមិនមានថវិកាចិញ្ចឹមជីវិត នៅពេលធ្លាក់ខ្លួនជាមនុស្សចាស់ជរា ហើយគោលនយោបាយទាំងនោះមានដូចជា៖

១. ផ្តល់ជូនកញ្ចប់ប្រាក់ឌីជីថលដើម្បីជំរុញសេដ្ឋកិច្ច និងបន្ធូរបន្ថយទុក្ខលំបាកវេទនាក្នុងចំណោមប្រជាជនចាស់ជរា

២. បង្កើតកម្មករដែលមានជំនាញខ្ពស់ចំនួន ២០ លាននាក់ និងផ្តល់លទ្ធភាពឲ្យកម្មករនិយោជិតចូលនិវត្តន៍ អាចបង្កើតប្រាក់ចំណូលបាន

៣. បង្កើនប្រាក់ចំណូលកសិកម្មឡើងដល់ ៣ ដង

៤. ធ្វើឲ្យប្រសើរឡើងនូវគម្រោងថែទាំសុខភាព ដូចជា ការអនុញ្ញាតឲ្យប្រជាជនទទួលការព្យាបាលដោយគ្រាន់តែបង្ហាញអត្តសញ្ញាណប័ណ្ណរបស់ពួកគេ ក៏ដូចជាផ្តល់ការព្យាបាលដោយឥតគិតថ្លៃសម្រាប់អ្នកជំងឺធ្ងន់ធ្ងរ និងអ្នកជំងឺដែលជិតផុតដង្ហើម

៥. អនុញ្ញាតឲ្យមនុស្សរៀនពីរបៀបបង្កើតប្រាក់ចំណូល និងការរៀបចំទុកដាក់ការងារណាដែលសមនឹងជំនាញរបស់ពួកគេ

ទន្ទឹមនោះ លោកស្រី Linthiporn បានលើកឡើងទៀតថា “ភឿថៃ គឺជាគណបក្សនយោបាយតែមួយគត់ដែលហ៊ាននិយាយប្រាប់អំពីរបៀបបង្កើតប្រាក់ចំណូល ដើម្បីផ្តល់សុខុមាលភាពដល់ក្រុមប្រជាពលរដ្ឋដែលងាយរងគ្រោះទាំងអស់ក្នុងប្រទេស” ។

គួរបញ្ជាក់ថា គណបក្សភឿថៃ ដែលជាបក្សឈ្នះឆ្នោតលំដាប់ទី ២ ប្រមែប្រមូលបានគណបក្សចំនួន ៧ ហើយចូលទៅក្នុងក្រុមចម្រុះ និងមានសំឡេងសរុប ២២៨ ហើយត្រូវការសំឡេងពីសមាជិកព្រឹទ្ធសភា និងរដ្ឋសភាយ៉ាងតិច ៣៧៦ នៅក្នុងការបោះឆ្នោតសភាជុំបន្ទាប់ ដើម្បីក្លាយជានាយករដ្ឋមន្ត្រីទី ៣០ របស់ប្រទេសថៃ ក្រោយពេលដែលលោក Pita បានបាត់ឱកាសមាស ដោយសារតែគោលបំណងចង់កែប្រែច្បាប់ប្រមាថព្រះមហាក្សត្រ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ បក្សភឿថៃ នឹងបញ្ចូលបក្សលោក ប្រាយុទ្ធ និងលោក ប្រាវីដ ចូលក្នុងក្រុម ចម្រុះដើម្បីបង្កើតរដ្ឋាភិបាលថ្មី