ចលនាឆ្ពោះទៅមុខ៖ បើខ្លួនគាំទ្របេក្ខជននាយករដ្ឋមន្ត្រីខាងបក្សភឿថៃ នោះនឹងជាការក្បត់ម្ចាស់ឆ្នោត

គណបក្សចលនាឆ្ពោះទៅមុខ ដែលឈ្នះការបោះឆ្នោតរបស់ប្រទេសថៃ បានប្រកាសថា ខ្លួននឹងមិនបោះឆ្នោតឲ្យបេក្ខជននាយករដ្ឋមន្ត្រីរបស់គណបក្សភឿថៃគឺលោក Srettha Thavisin ឡើយ ព្រោះខ្លួនមិនចង់ក្បត់ម្ចាស់ឆ្នោត ខណៈការ​សម្រេច​ចិត្ត​នេះ ​ត្រូវ​បាន​ធ្វើ​ឡើង​ជា​ឯកច្ឆ័ន្ទ​ក្នុង​កិច្ច​ប្រជុំបក្ស ​កាល​ពី​ថ្ងៃ​អង្គារ ទី១៥ ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ព័ន្ធដែលដឹកនាំដោយគណបក្សភឿថៃ បាននិងកំពុងខិតខំប្រឹងប្រែង ដើម្បីស្វែងរកការគាំទ្រកាន់តែច្រើនពីសមាជិកនៃសភាទាំងពីរ ហើយថែមទាំងបានជួបពិភាក្សា ជាមួយគណបក្សចលនាឆ្ពោះទៅមុខផងដែរ កាលពីថ្ងៃពុធសប្តាហ៍មុន។

អគ្គលេខាធិការបក្សចលនាឆ្ពោះទៅមុខ លោក Chaithawat Tulathon បានប្រាប់អ្នកសារព័ត៌មានថា គណបក្សបានសម្រេចចិត្ត មិនបោះឆ្នោតឲ្យលោក Srettha ព្រោះមិនចង់មានទំនាក់ទំនងជាមួយនឹងការបង្កើតរដ្ឋាភិបាលថ្មី។

លោក​និយាយ​ថា “យើង​ចាត់​ទុក​ កិច្ច​ខិត​ខំ​បច្ចុប្បន្ន​ដើម្បី​បង្កើត​រដ្ឋាភិបាល គឺ​ផ្ទុយ​ពី​ឆន្ទៈ​របស់​ប្រជាជន ដែល​ត្រូវ​បាន​បង្ហាញ​ដោយ​លទ្ធផល​នៃ​ការ​បោះ​ឆ្នោត​ថ្ងៃ​ទី១៤ ខែ​ឧសភា”។

ណាមួយ លោក Chaithawat អះអាងថា ការបោះឆ្នោតជ្រើសរើសបេក្ខជន មកពីសម្ព័ន្ធភាពដែលដឹកនាំដោយគណបក្សភឿថៃ គឺប្រឆាំងនឹងគោលបំណងបក្សរបស់គាត់ ដែលចង់បំបាត់អំណាចនៃសមាជិកព្រឹទ្ធសភាដែលត្រូវបានតែងតាំងដោយយោធា។

គួរបញ្ជាក់ជាថ្មី គណបក្សចលនាឆ្ពោះទៅមុខ បានឈ្នះការបោះឆ្នោតជាមួយនឹងអាសនៈសមាជិកសភាចំនួន១៥១៕

ប្រែសម្រួល៖ Vann Vann

ប្រភព៖ Nation

ចុចអាន៖ សភា ថៃ ប្រកាសថ្ងៃបោះឆ្នោតជ្រើសរើសនាយករដ្ឋមន្ត្រីជុំបន្ទាប់