រុស្ស៊ី ថា បើ អ៊ុយក្រែន ព្រមចោលទឹកដីដើម្បីតែចង់ចូល ណាតូ នោះទីក្រុង កៀវ ក៏នឹងបាត់ខ្លួនដែរ

អនុប្រធានក្រុមប្រឹក្សាសន្តិសុខរុស្ស៊ីលោក Dmitry Medvedev បានសរសេរបង្ហោះនៅលើបណ្ដាញ Telegram ថា ប្រសិនបើអ៊ុយក្រែនពិតជាយល់ព្រមលះបង់ទឹកដីដែលមានជម្លោះដើម្បីបម្រើជាប្រយោជន៍ដល់ការចូលរួមក្នុងអង្គការណាតូ នោះទីក្រុងកៀវក៏នឹងបាត់ខ្លួនផងដែរ ។

ការលើកឡើងរបស់លោក Medvedev គឺជាការឆ្លើយតបទៅនឹងការអត្ថាធិប្បាយរបស់លោក Stian Jenssen ប្រធានការិយាល័យរបស់អគ្គលេខាធិការអង្គការណាតូ បន្ទាប់ពីលោកបាននិយាយថា ឥទ្ធិពលដែលអ៊ុយក្រែនអាចក្លាយជាសមាជិកនៃសម្ព័ន្ធភាពយោធាមួយនេះ គឺស្ថិតក្នុងករណីសម្បទានទឹកដីទៅឲ្យរុស្ស៊ី ។

ពាក់ព័ន្ធនឹងបញ្ហានេះ លោក Medvedev បានសរសេរថា “ហេតុអ្វីបានជាគំនិតនេះមានអ្នកចង់ដឹងចង់ឃើញខ្លាំងម្ល៉េះ ។ សំណួរ និងចម្លើយតែមួយគត់គឺថា ប្រសិនបើអ៊ុយក្រែនចូលរួមទៅក្នុងប្លុកណាតូ នោះអ៊ុយក្រែនក៏នឹងត្រូវបោះបង់ចោលសូម្បីតែទីក្រុងកៀវ ដែលជារដ្ឋធានីនៃបូរាណរបស់រុស្ស៊ី ។

អតីតប្រធានាធិបតីរូបនេះបានកត់សម្គាល់ថា “ប្រសិនបើអ៊ុយក្រែននៅតែទទូចចង់ចូលរួមជាមួយអង្គការណាតូមែននោះ ច្បាស់ណាស់ថា អាជ្ញាធរអ៊ុយក្រែននឹងត្រូវផ្លាស់ប្តូរទីក្រុងកៀវ ទៅទីក្រុង Lviv ដែលស្ថិតនៅភាគខាងកើតប្រទេស” ។

គួរបញ្ជាក់ថា រហូតមកដល់ពេលនេះ សង្គ្រាមលុកលុយរបស់រុស្ស៊ីលើអ៊ុយក្រែនបានអូសបន្លាយពេលជិត ១ ឆ្នាំកន្លះហើយ ក្រោយពេលដែលលោកប្រធានាធិបតី វ្ល៉ាឌីមៀរ ពូទីន ប្រកាសបើកការវាយលុកលើកងកម្លាំងទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ដោយសារតែគោលបំណងរបស់អ៊ុយក្រែនចង់ចូលអង្គការណាតូនេះឯង ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ថា អាវុធដែលលោកខាងលិចផ្ដល់ឲ្យ អ៊ុយក្រែន សុទ្ធតែធុនអន់