ប្រធានសភា ថៃ លើកពេលបោះឆ្នោតជ្រើសរើសនាយករដ្ឋមន្ត្រីថ្មី ទៅសប្ដាហ៍ក្រោយ

ប្រធានសភាថៃលោក Wan Muhamad Noor Matha បានកំណត់យកថ្ងៃទី២២ ខែសីហា ជាកាលបរិច្ឆេទនៃសម័យប្រជុំរួមគ្នារវាងសមាជិករដ្ឋសភា និងព្រឹទ្ធសភា ដើម្បីបោះឆ្នោតជ្រើសរើសនាយករដ្ឋមន្ត្រីថ្មី ។

កាលបរិច្ឆេទថ្មីនេះត្រូវបានកំណត់ឡើង បន្ទាប់ពីតុលាការធម្មនុញ្ញកាលពីថ្ងៃពុធបានច្រានចោលញត្តិរបស់គណបក្សចលនាឆ្ពោះទៅមុខ ដើម្បីឲ្យពិនិត្យមើលឡើងវិញនូវសេចក្ដីសម្រេចរបស់សភា ដែលបានរារាំងបេក្ខជននាយករដ្ឋមន្ត្រីរបស់ខ្លួនគឺលោក Pita Limjaroenrat មិនឲ្យឈរឈ្មោះបោះឆ្នោតលើកទី ២ ។

ទន្ទឹមនោះ សម្រាប់ការបោះឆ្នោតជុំបន្ទាប់នេះដែរ គណបក្សភឿថៃ ដែលជាបក្សឈ្នះឆ្នោតលំដាប់ទី ២ នឹងធ្វើជាអ្នកដឹកនាំក្នុងការបង្កើតរដ្ឋាភិបាលថ្មី ហើយរហូតមកដល់ពេលនេះ បក្សកូនស្រីលោក ថាក់ស៊ីន មួយនេះប្រមែប្រមូលបានគណបក្សចំនួន ៧ ហើយចូលទៅក្នុងក្រុមចម្រុះ និងមានសំឡេងសរុប ២២៨ ។

ទោះយ៉ាងណា ក្រុមចម្រុះដែលដឹកនាំគណបក្សភឿថៃ ត្រូវការសំឡេងពីសមាជិកព្រឹទ្ធសភា និងរដ្ឋសភាយ៉ាងតិច ៣៧៦ ក្នុងចំណោមអាសនៈ ៥០០ នៅក្នុងការបោះឆ្នោតសភាជុំបន្ទាប់ ដើម្បីក្លាយជានាយករដ្ឋមន្ត្រីទី ៣០ របស់ប្រទេសថៃ ។

គួរបញ្ជាក់ថា រហូតមកដល់ពេលនេះប្រទេសថៃបានស្ថិតនៅក្រោមរដ្ឋាភិបាលចាំផ្ទះអស់រយៈពេល ៥ ខែមកហើយ បន្ទាប់ពីគណបក្សចលនាឆ្ពោះទៅមុខ ដែលជាបក្សឈ្នះឆ្នោត មិនអាចបង្កើតរដ្ឋាភិបាលថ្មីបានឡើយ ក្រោយពេលដែលមិនទទួលបានសំឡេងគាំទ្រគ្រប់គ្រាន់ពីសមាជិកសភាដែលតែងតាំងដោយយោធា ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ បក្សភឿ ថៃ នឹងបញ្ចូលបក្សលោក ប្រាយុទ្ធ និងលោក ប្រាវីដ ចូលក្នុងក្រុម​ចម្រុះដើម្បីបង្កើតរដ្ឋាភិបាលថ្មី