ធ្លាក់យន្តហោះនៅ ម៉ាឡេស៊ី ស្លាប់មនុស្ស ១០ នាក់ រួមទាំងសមាជិកសភា

យន្តហោះឯកជនមួយគ្រឿងបានធ្លាក់ និងផ្ទុះឆេះលើផ្លូវដ៏មមាញឹកក្នុងប្រទេសម៉ាឡេស៊ី ដោយបណ្តាលឲ្យមនុស្សចំនួន ១០ នាក់ត្រូវបាត់បង់ជីវិត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះ បានធ្លាក់នៅទីប្រជុំជន Elmina ក្នុងទីក្រុង Shah Alam នៃរដ្ឋ Selangor មុនម៉ោង៣រសៀល (ម៉ោងក្នុងស្រុក) ថ្ងៃព្រហស្បតិ៍ ទី១៧ខែសីហា ក្រោយពេលចាកចេញពីកោះរមណីយដ្ឋាន Langkawi។

ប៉ូលិសនិយាយថា លោក Johari Harun ដែលជាសមាជិកសភារដ្ឋ Pahang ទទួលបន្ទុកផ្នែកលំនៅដ្ឋាននិងបរិស្ថាន គឺស្ថិតក្នុងចំណោមអ្នកដំណើរក្នុងយន្តហោះ ដែលបាត់បង់ជីវិត។

ស្របពេលជាមួយគ្នានោះ សាក្សីបាននិយាយថា យន្តហោះឈ្មោះ Beechcraft Premier 1 ដែលមានលេខកន្ទុយ N28jV មួយគ្រឿងនេះ ដំបូងបានធ្លាក់លើផ្លូវថ្នល់ ប៉ុន្តែក្រោយមក ក៏ហួសទៅលើវាលស្មៅ។

ចំណែកលោក Mohamad Syahmie Mohamad Hashim អតីតសមាជិកនៃកងទ័ពអាកាសម៉ាឡេស៊ី បានប្រាប់ AFP ថា លោកបានឃើញយន្តហោះនេះ ហោះខុសប្រក្រតី។

លោក​និយាយ​ថា “​មិន​យូរ​ប៉ុន្មាន ​ខ្ញុំ​បាន​ឮ​សំឡេង​ផ្ទុះ​។ ខ្ញុំ​ប្រញាប់​ទៅ​កាន់​ទីតាំង​ ហើយ​ក៏​ឃើញ​បំណែក​យន្តហោះ​។​ ខ្ញុំ​មិន​អាច​ធ្វើ​អ្វី​បាន​ឡើយ”។

ទោះបីជាយ៉ាងណាក៏ដោយ ភ្លាមៗ មូលហេតុនៃគ្រោះថ្នាក់នេះ មិនទាន់ត្រូវបានគេដឹងទេ ខណៈពេលនេះ ក្រុមអ្នកស៊ើបអង្កេត កំពុងព្យាយាមស្វែងរកប្រអប់ខ្មៅរបស់យន្តហោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ មនុស្ស ៣នាក់ស្លាប់ ក្នុងហេតុការណ៍ធ្លាក់យន្តហោះនៅស្វីស