Elon Musk ​ត្រៀមខ្លួនប្រកួតជាមួយ Mark Zuckerberg ជានិច្ច មិនថាក្នុងលក្ខណៈបែបណាឡើយ

មហាសេដ្ឋី Elon Musk បានប្រាប់ថា មេក្រុមហ៊ុន Meta គឺលោក Mark Zuckerberg បានបដិសេធសំណើរក្នុងការប្រកួតដើម្បីសប្បុរសធម៌នៅក្នុងប្រទេសអ៊ីតាលី ទោះបីជាទទួលបានការគាំទ្រពីរដ្ឋមន្ត្រីក្រសួងវប្បធម៌អ៊ីតាលី Gennaro Sangiuliano ក៏ដោយ ។

តាមរយៈសំណេរក្នុងបណ្តាញសង្គម X លោកបានអរគុណដល់លោករដ្ឋមន្ត្រី Sangiuliano សម្រាប់សេចក្តីសប្បុរស និងឆន្ទៈរបស់គាត់ក្នុងការរៀបចំកម្មវិធីកម្សាន្ត និងវប្បធម៌នៅក្នុងប្រទេសអ៊ីតាលី ប៉ុន្តែមហាសេដ្ឋី Mark Zuckerberg បានបដិសេធការផ្តល់ជូននេះ ដោយសារលោកមិនចាប់អារម្មណ៍ ដោយចង់វាយបែបគុនចម្រុះ UFC វិញ ។

ទោះជាយ៉ាងណាក៏ដោយ Elon Musk បញ្ជាក់ថា លោកត្រៀមខ្លួនជានិច្ចសម្រាប់ការប្រយុទ្ធដ៏អស្ចារ្យជាមួយ Mark Zuckerberg មិនថាប្រកួតក្នុងលក្ខណៈបែបណានោះទេ ។

គួរបញ្ជាក់ថា រហូតមកដល់ពេលនេះ​ ទាំង Elon Musk និង Mark Zuckerberg សុទ្ធតែបានហ្វឹកហាត់ជាមួយអ្នកប្រយុទ្ធ UFC​ ដូចគ្នា ដើម្បីត្រៀមសម្រាប់ការប្រកួតវាយក្នុងទ្រុងដែលអាចនឹងកើតមានឡើងក្នុងពេលឆាប់ៗខាងមុខនេះ ៕

ប្រែសម្រួល៖ នាង រតនៈ

ប្រភព៖ Sputnik