ព័ត៌មានអន្ដរជាតិ

កូនស្រីពៅលោក ថាក់ស៊ីន ប្រកាសថ្ងៃដែលឪពុកចូលស្រុកសាជាថ្មី

បានផុស

១ year មុន

នៅ

ថ្ងៃសៅរ៍ ១៩ សីហា ២០២៣

ដោយ

លោកស្រី Paetongtarn Shinawatra បានប្រកាសសារជាថ្មីនៅលើប្រព័ន្ធផ្សព្វផ្សាយសង្គម នាព្រឹកថ្ងៃសៅរ៍នេះថា អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត្រា នឹងត្រឡប់ចូលប្រទេសកំណើត នៅថ្ងៃអង្គារ៍សប្ដាហ៍ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Paetongtarn ដែលជាបេក្ខភាពនាយករដ្ឋមន្ត្រីមួយរូបក្នុងចំណោមបេក្ខភាពនាយករដ្ឋមន្ត្រីទាំងបីរបស់គណបក្សភឿថៃ បានសរសេរនៅលើ Instagram របស់គាត់ថា “នៅថ្ងៃអង្គារ ទី ២២ ខែសីហា វេលាម៉ោង ៩ព្រឹក ខ្ញុំនឹងនៅប្រលានយន្តហោះដុនមឿង ដើម្បីស្វាគមន៍ឪពុកខ្ញុំថាក់ស៊ីន” ។

លោកស្រីក៏បានបង្ហោះសារដែលនិយាយថា គម្រោងត្រឡប់ទៅប្រទេសកំណើតរបស់ឪពុក មិនត្រូវបានលុបចោលទេ ប៉ុន្តែត្រូវបានពន្យារពេល ដោយបន្ថែមថានេះមិនមែនជាការនិយាយមិនសមហេតុសមផលនោះទេ។ ស្របពេលដែល លោក ថាក់ស៊ីន បានបង្ហោះសារមួយលើបណ្ដាញសង្គម X កាលពីថ្ងៃទី០៥ ខែសីហា ដោយនិយាយថា គាត់កំពុងពន្យារពេលការវិលត្រឡប់ ដោយសារគ្រូពេទ្យចង់ឲ្យគាត់ពិនិត្យសុខភាព។

ទន្ទឹមនោះ កាលបរិច្ឆេទនេះក៏ត្រូវនឹងថ្ងៃដែលលោក Wan Muhamad Noor Matha ប្រធានសភាថៃនឹងកោះប្រជុំសមាជិករដ្ឋសភានិងព្រឹទ្ធសភា ដើម្បីធ្វើការបោះឆ្នោតជ្រើសរើសបេក្ខភាពនាយករដ្ឋមន្ត្រីរបស់បក្សភឿថៃ ដែលនឹងតែងតាំងលោក Srettha Thavisin ។

សូមរម្លឹកដែរថា នៅថ្ងៃខួបកំណើតគម្រប់ ៧៤ ឆ្នាំរបស់ថាក់ស៊ីន ថ្ងៃទី ២៦ ខែកក្កដា លោកស្រី Paetongtarn បានប្រកាសថា ឪពុករបស់ខ្លួននឹងមកដល់អាកាសយានដ្ឋានដុនមឿងនៅថ្ងៃទី ១០ ខែសីហា ប៉ុន្តែអ្នកសង្កេតការណ៍នយោបាយរួមមានលោក Chuvit Kamolvisit និងលោក Jatuporn Prompan និយាយដូចៗគ្នាថា ផែនការវិលត្រឡប់របស់គាត់គឺគ្មានអ្វីក្រៅពីសន្យាខ្យល់។ នេះបានជំរុញឲ្យមានប្រតិកម្មពីលោកស្រី Paetongtarn តបតទៅវិញថា ការអត្ថាធិប្បាយរបស់លោក Chuvit គឺមិនសមហេតុសមផល ហើយច្រណែនឪពុកគាត់តែប៉ុណ្ណោះ៕