បក្សប្រជាធិបតេយ្យ ចង់ដឹងថា បក្សភឿថៃ ដាក់អ្នកណាជាបេក្ខភាព​នាយករដ្ឋមន្ត្រី ជាមុនសិន ទើបបោះឆ្នោតឲ្យ

គណបក្ស​ប្រជាធិបតេយ្យ​ចង់​ដឹង​ថា គណបក្សភឿថៃដាក់អ្នកណាជាបេក្ខភាពនាយករដ្ឋមន្ត្រីជាមុនសិន ទើបធ្វើការសម្រេចចិត្តថាតើត្រូវបោះឆ្នោតឲ្យពួកគេ ឬក៏យ៉ាងណានោះ ។

ប្រធានស្ដីទីគណបក្ស លោក Jurin Laksanawisit បាននិយាយកាលពីពេលថ្មីៗនេះថា នៅពេលដែលគណបក្សរបស់លោកស្គាល់ឈ្មោះអ្នកដែលត្រូវបានតែងតាំងជាបេក្ខភាពនាយករដ្ឋមន្ត្រីហើយនោះ វានឹងមិនពិបាកសម្រាប់គណបក្សប្រជាធិបតេយ្យក្នុងការបោះឆ្នោតឲ្យឡើយ ។

ក្នុងដំណាក់កាលនេះ ស្ថានការណ៍នយោបាយជុំវិញបេក្ខភាពនាយករដ្ឋមន្ត្រីរបស់គណបក្សភឿថៃ នៅតែមិនប្រាកដប្រជា បើទោះជាបក្សភឿថៃបានបញ្ជាក់ថា នឹងតែងតាំងលោក Srettha Thavisin ជាបេក្ខភាពនាយករដ្ឋមន្ត្រីមួយរូបក្នុងចំណោមបេក្ខភាពនាយករដ្ឋមន្ត្រីទាំងបីរបស់ខ្លួនក៏ដោយ ។

ពាក់ព័ន្ធនឹងបញ្ហានេះដែរ ប្រធានសភាថៃលោក Wan Muhamad Noor Matha បានកំណត់ថ្ងៃទី ២២ ខែសីហាសម្រាប់ការកោះប្រជុំសភាទាំងពីរដើម្បីបោះឆ្នោតជ្រើសរើសនាយករដ្ឋមន្ត្រីថ្មី បន្ទាប់ពីជាប់គាំងក្នុងការបង្កើតរដ្ឋាភិបាលថ្មីអស់រយៈពេល ៥ ខែមកនេះ ។

គួរបញ្ជាក់ថា រហូតមកដល់ពេលនេះ គណបក្សភឿថៃប្រមែប្រមូលបានគណបក្សចំនួន ៧ ហើយចូលទៅក្នុងក្រុមចម្រុះ និងមានសំឡេងសរុប ២២៨ ហើយត្រូវការសំឡេងពីសមាជិកព្រឹទ្ធសភា និងរដ្ឋសភាយ៉ាងតិច ៣៧៦ នៅក្នុងការបោះឆ្នោតសភាជុំបន្ទាប់ ដើម្បីក្លាយជានាយករដ្ឋមន្ត្រីទី ៣០ របស់ប្រទេសថៃ ក្រោយពេលដែលលោក Pita បានបាត់ឱកាសមាស ដោយសារតែគោលបំណងចង់កែប្រែច្បាប់ប្រមាថព្រះមហាក្សត្រ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ រដ្ឋមន្ត្រីស្ដីទីក្រសួងយុត្តិធម៌ ថៃ ៖ លោក ថាក់ស៊ីន នឹងនាំទៅពន្ធនាគារ ពេលត្រលប់ចូលស្រុកវិញ