តៃវ៉ាន់ និយាយលម្អិតគ្មានសល់អំពីសមយុទ្ធយោធារបស់ ចិន

ក្រសួងការពារជាតិតៃវ៉ាន់នៅថ្ងៃអាទិត្យនេះបានចេញមកបញ្ជាក់លម្អិតគ្មានសល់អំពីការធ្វើសមយុទ្ធយោធាដោយកំហឹងរបស់ប្រទេសចិននៅជុំវិញកោះនេះ បន្ទាប់ពីដំណើរទស្សនកិច្ចរបស់អនុប្រធានាធិបតីលោក William Lai ទៅកាន់សហរដ្ឋអាមេរិកក្នុងខែនេះ ។

ក្រសួងការពារជាតិតៃវ៉ាន់បញ្ជាក់ថា ក្នុងរយៈពេល ២៤ ម៉ោងកន្លងមកនេះ យន្តហោះចម្បាំងកងទ័ពអាកាសចិនដែលរួមមានធុន Su-30 ក៏ដូចជាយន្តហោះចម្បាំង J-11 ចំនួន ៤២ គ្រឿងបានហោះនៅជុំវិញកោះនេះ ហើយក្នុងនោះ ២៥ គ្រឿងបានឆ្លងកាត់ខ្សែបន្ទាត់មធ្យមនៃច្រកសមុទ្រតៃវ៉ាន់ ។

ពាក់ព័ន្ធនឹងបញ្ហានេះដែរ មន្ត្រីតៃវ៉ាន់បានលើកឡើងថា ប្រទេសចិនបានធ្វើសមយុទ្ធយោធានៅជិតកោះនេះ ដោយប្រើការឈប់ចុះចតរបស់លោក Lai នៅសហរដ្ឋអាមេរិក ជាលេសដើម្បីបំភិតបំភ័យអ្នកបោះឆ្នោត មុនការបោះឆ្នោតប្រធានាធិបតីនៅឆ្នាំក្រោយ ។

ជាការឆ្លើយតប កងទ័ពជើងទឹករបស់កោះតៃវ៉ាន់បានបញ្ចេញនាវាចម្បាំងដឹកមីស៊ីល Tian Dan ឆ្ពោះទៅភាគខាងត្បូងកោះតៃវ៉ាន់ដើម្បីទៅឃ្លាំមើលការធ្វើសមយុទ្ធយោធារបស់ចិននៅក្នុងដែនទឹក និងដែនអាកាសជុំវិញកោះតៃវ៉ាន់កាលពីថ្ងៃសៅរ៍ ។

គួរបញ្ជាក់ថា ទីបញ្ជាការដ្ឋានភូមិភាគខាងកើតនៃកងទ័ពរំដោះប្រជាជនចិនបានប្រកាសពីការធ្វើសមយុទ្ធល្បាត និងសមយុទ្ធរួមគ្នារវាងកងទ័ពដែនទឹក និងដែនអាកាសនៅសមុទ្រចិនខាងកើត និងច្រកសមុទ្រតៃវ៉ាន់ ដើម្បីសាកល្បងការសម្របសម្រួល និងសមត្ថភាពប្រយុទ្ធរបស់កងទ័ព ដើម្បីដណ្តើមគ្រប់គ្រងដែនអាកាស និងដែនទឹកនៅភាគខាងជើង និងភាគនិរតីនៃកោះតៃវ៉ាន់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ បក្សប្រជាធិបតេយ្យ ចង់ដឹងថា បក្សភឿថៃ ដាក់អ្នកណាជាបេក្ខភាព​នាយករដ្ឋមន្ត្រី ជាមុនសិន ទើបបោះឆ្នោតឲ្យ