វៀតណាមផ្ដល់ប្រាក់កម្ចីឲ្យអតីតអ្នកទោស ដើម្បីកសាងជីវិតថ្មី

រដ្ឋាភិបាល​វៀតណាម​កំពុង​បង្កើន​កិច្ច​ខិតខំ​ប្រឹងប្រែង​ដើម្បី​ជួយ​អ្នក​ដែល​ធ្លាប់​ជាប់​គុក​ ឲ្យកសាងជីវិតថ្មី​ដោយ​ការ​ផ្តល់ប្រាក់​កម្ចី​ ។

បើយោងតាមការសម្រេចចិត្តថ្មីៗដែលចុះហត្ថលេខាដោយនាយករដ្ឋមន្ត្រី អ្នកដែលត្រូវបានដោះលែងពីពន្ធនាគារមានសិទ្ធិទទួលប្រាក់កម្ចីអតិបរមាចំនួន ៤ ២០០ ដុល្លារ ក្នុងគោលបំណងផលិតកម្ម និងអាជីវកម្ម ។

ចំណែកឯអតីតអ្នកទោសផ្សេងទៀតដែលមានបំណងបង្កើនជំនាញការងាររបស់ពួកគេ អាចខ្ចីប្រាក់អតិបរមាចំនួន ១៦៨ ដុល្លារ ក្នុងមួយខែ ។ ប៉ុន្តែដើម្បីទទួលបានប្រាក់កម្ចី អតីតអ្នកទោសត្រូវតែគោរពច្បាប់វៀតណាមទាំងអស់ ហើយមិនត្រូវប្រព្រឹត្តអំពើអាក្រក់ក្នុងសង្គមណាមួយឡើយ បន្ទាប់ពីការដោះលែង ។

ពួកគេត្រូវបានអនុញ្ញាតឱ្យទទួលប្រាក់កម្ចីក្នុងរយៈពេល ៥ ឆ្នាំបន្ទាប់ពីការដោះលែង ។ សូម្បីរោងចក្រ រួមទាំងសហគ្រាសធុនតូច និងមធ្យម សហករណ៍ និងគ្រួសារអាជីវកម្ម ដែលផ្តល់ការងារដល់អតីតអ្នកទោស ក៏មានសិទ្ធិទទួលបានប្រាក់កម្ចីទាំងនេះផងដែរ លុះត្រាពួកគេមានកម្មករជាអតីតអ្នកទោសយ៉ាងហោចណាស់ ១០ ភាគរយ ។

ក្រុមហ៊ុនមានសិទ្ធិទទួលបានប្រាក់កម្ចីរហូតដល់ ៨៤ ០០០ ដុល្លារ សម្រាប់គម្រោងនីមួយៗ ។ ដោយឡែកអតីតអ្នកទោស និងក្រុមហ៊ុនមិនអាចទទួលបានប្រាក់កម្ចីទេ ប្រសិនបើពួកគេកំពុងជំពាក់បំណុលធនាគារវៀតណាមផ្សេងទៀត ។

យោងតាមសេចក្តីសម្រេច អត្រាការប្រាក់កម្ចីគឺស្មើនឹងប្រាក់កម្ចីដែលផ្តល់ដល់គ្រួសារក្រីក្រប៉ុណ្ណោះ ៕

ប្រែសម្រួល៖ វារី

ប្រភព៖ tuoitrenews

ចុចអាន៖ កាត់ទោសអ្នកជួញដូរផ្លូវភេទលើតារាស្រីតម្លៃរាប់ម៉ឺនដុល្លារ នៅប្រទេសវៀតណាម

ចុចអាន៖ IMF យល់ព្រមផ្តល់កម្ចី​ ១៥.៦ ពាន់លានដុល្លារដល់អ៊ុយក្រែន