បក្សភឿថៃ ប្រមែប្រមូលបានក្រុមចម្រុះចំនួន ១០ និងមានអាសនៈកាន់តែ​កៀកដើម្បីបង្កើតរដ្ឋាភិបាលថ្មី

គណបក្សភឿថៃ និងគណបក្សចំនួន ១០ ផ្សេងទៀត ដែលក្នុងនោះបក្សចំនួន ២ មានទំនាក់ទំនងជាមួយនឹងយោធា នៅថ្ងៃចន្ទនេះបានប្រកាសចូលរួមក្នុងក្រុមចម្រុះដែលមានសំឡេងសរុប ៣១៤ នៅក្នុងសភា ខណៈបក្សភឿថៃតែងតាំងលោក Srettha Thavisin ជាបេក្ខភាពនាយករដ្ឋមន្ត្រី ។

គណបក្សភឿថៃដែលជាបក្សឈ្នះឆ្នោតលំដាប់ទី ២ មានសមាជិកសភាចំនួន ១៤១ រូប ហើយក៏ជាក្បាលម៉ាស៊ីនក្នុងការដឹកនាំក្រុមចម្រុះទាំង ១១ ដើម្បីបង្កើតរដ្ឋាភិបាលថ្មីផងដែរ បន្ទាប់ពីគណបក្សចលនាឆ្ពោះទៅមុខរបស់លោក Pita បាត់បង់ឱកាសមាសមួយនេះ ដោយសារតែចង់កែប្រែច្បាប់ប្រមាថព្រះមហាក្សត្រ ។

ចំណែកគណបក្សដែលឈ្នះអាសនៈក្នុងការបោះឆ្នោតជាបន្តបន្ទាប់ និងចូលរួមជាមួយគណបក្សភឿថៃ រួមមាន បក្សភូមិចៃថៃ មាន ៧១ អាសនៈ, បក្សផាឡាង ប្រាឆារ៉ាត់ មាន ៤០ អាសនៈ និងបក្សថៃរួបរួមជាតិ មាន ៣៦ អាសនៈ ។

ដោយឡែក ដៃគូចំនួន ៧ ផ្សេងទៀតគឺ បក្សឆាតថៃផាតាណា មាន ១០ អាសនៈ, បក្សប្រាឆាឆាត មាន ៩ អាសនៈ, បក្សភឿថៃរួមបាឡាំង មាន ២ អាសនៈ, បក្សឆាតផាតាណាខ្លា មាន ២ អាសនៈ ខណៈបក្សសេរីរួមថៃ, ផ្លុងសង្គមម៉ៃ និងគណបក្សស្រុកថៃ សុទ្ធតែមាន ១ អាសនៈដូចៗគ្នា ។

ពាក់ព័ន្ធនឹងបញ្ហានេះដែរ មេដឹកនាំគណបក្សភឿថៃ លោក Cholnan Srikaew បានប្រាប់សន្និសីទសារព័ត៌មានថា គណបក្សភឿថៃនឹងមានរដ្ឋមន្ត្រីចំនួន ៨ រូប និងអនុរដ្ឋមន្ត្រីចំនួន ៩ រួមទាំងទីស្ដីការនាយករដ្ឋមន្ត្រីផងដែរ ។

គួរបញ្ជាក់ថា ប្រធានសភាថៃលោក Wan Muhamad Noor Matha បានកំណត់យកថ្ងៃទី២២ ខែសីហា ជាកាលបរិច្ឆេទនៃសម័យប្រជុំរួមគ្នារវាងសមាជិករដ្ឋសភា និងព្រឹទ្ធសភា ដើម្បីបោះឆ្នោតជ្រើសរើសនាយករដ្ឋមន្ត្រីថ្មី ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ប្រជាជន ថៃ ស្រលាញ់ពេញចិត្តកូនស្រីលោក ថាក់ស៊ីន ធ្វើជានាយករដ្ឋ​មន្ត្រី