កូនស្រីលោក ថាក់ស៊ីន ប្រាប់មូលហេតុដែលលោក ស្រេតថា ស័ក្ដិសមធ្វើជា​នាយករដ្ឋមន្ត្រី

កូនស្រីរបស់លោក ថាក់ស៊ីន គឺលោកស្រី ផេថងថាន បានបង្ហាញពីទំនុកចិត្តថា បេក្ខភាពនាយករដ្ឋមន្ត្រីរបស់បក្សភឿថៃ លោក ស្រេតថា ថាវីស៊ីន នឹងត្រូវបានជ្រើសរើសជានាយករដ្ឋមន្ត្រីនៅក្នុងការបោះឆ្នោតសភានាថ្ងៃទី២២ ខែសីហានេះ ។

ទន្ទឹមនោះ លោកស្រី ផេថងថាន ក៏បានប្រាប់ពីមូលហេតុដែលលោក ស្រេតថា ពិតជាស័ក្តិសមធ្វើជានាយករដ្ឋមន្ត្រីទី ៣០ របស់ថៃផងដែរ ដោយសារតែអតីតមហាសេដ្ឋីអចលនទ្រព្យរូបនេះ មិនជាប់ពាក់ព័ន្ធនឹងសំណុំរឿងក្ដីក្ដាំអ្វីដូចការចោទប្រកាន់នោះឡើយ ។

កូនស្រីលោក ថាក់ស៊ីន រូបនេះបញ្ជាក់ទៀតថា លោក ស្រេតថា ស័ក្តិសមធ្វើជានាយករដ្ឋមន្ត្រីជាងគេ ដោយសារតែលោកមិនបានបំពានច្បាប់អចលនទ្រព្យណាមួយឡើយ ស្របពេលដែលទីប្រឹក្សាច្បាប់របស់គណបក្សភឿថៃ ក៏បានពិនិត្យរាល់ការចោទប្រកាន់ដែលបានធ្វើឡើងប្រឆាំងនឹងលោក ស្រេតថា រួចរាល់អស់ហើយផងដែរ ទាក់ទងនឹងអាជីវកម្មអចលនទ្រព្យរបស់គាត់ ។

រឿងរ៉ាវដ៏រសើបនេះបានកើតឡើង បន្ទាប់ពីលោក Chuwit Kamolvisit អតីតអ្នកនយោបាយថៃបានចោទប្រកាន់លោក ស្រេតថា អំឡុងពេលលោកកំពុងបម្រើការជានាយកប្រតិបត្តិនៃក្រុមហ៊ុនអចលនទ្រព្យ Sansiri ថាមានជាប់ពាក់ព័ន្ធក្នុងស្រមោលក្ដីក្ដាំមួយចំនួន ដែលអាចជាកិច្ចព្រមព្រៀងដីធ្លីខុសច្បាប់ ប៉ុន្តែលោកស្រី ផេថងថាន លើកឡើងថា ក្រុមហ៊ុនអចលទ្រព្យ Sansiri គឺជាក្រុមហ៊ុនដែលបានចុះបញ្ជីនៅលើទីផ្សារភាគហ៊ុនប៉ុណ្ណោះ ។

គួរបញ្ជាក់ថា ថ្ងៃទី២២ ខែសីហានេះ សភាថៃនឹងកោះប្រជុំសមាជិករដ្ឋសភា និងព្រឹទ្ធសភាដើម្បីបោះឆ្នោតជ្រើសរើសនាយករដ្ឋមន្ត្រី ខណៈគណបក្សភឿថៃគឺជាមេដឹកនាំក្រុមចម្រុះដែលរហូតមកដល់ពេលនេះប្រមែប្រមូលបានគណបក្សចំនួន ១០ ហើយ និងមាន ៣១៤ អាសនៈ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ លោក ថាក់ស៊ីន អញ្ជើញមកដល់ទឹកដី ថៃ វិញហើយ