ប្រវត្តិនាយករដ្ឋមន្ត្រីថៃ ដែលអញ្ជើញមកបំពេញទស្សនកិច្ចនៅ កម្ពុជា ថ្ងៃនេះ

លោក សេដ្ឋា ថាវីស៊ីន (Srettha Thavisin) បេក្ខភាពមកពីគណបក្សភឿថៃ ត្រូវបានសមាជិកសភាសម្រេចបោះឆ្នោតគាំទ្រឲ្យធ្វើជានាយករដ្ឋមន្ត្រីទី ៣០ របស់ប្រទេសជាផ្លូវការ កាលពីថ្ងៃអង្គារ ទី២២ ខែសីហា ដំណាលគ្នានឹងសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ក្នុង​នាម​ជា​នាយក​រដ្ឋ​មន្ត្រី​ដំបូង​គេ​របស់​ប្រទេស ​ក្នុង​រយៈ​ពេល​ជិត​មួយ​ទសវត្សរ៍​ដោយ​គ្មាន​ប្រវត្តិ​ខាង​យោធា និងកាន់កិច្ចការនយោបាយ ជីវប្រវត្តិ​របស់ឧកញ៉ាអចលនទ្រព្យ​រូប​នេះ​ កំពុងតែ​​ក្លាយជា​ប្រធានបទ​របស់​ប្រជាជនទូទាំងប្រទេស ស្របពេលដែលលោកក្លាយជានាយករដ្ឋមន្ត្រីទី ៣០ របស់ថៃ។

លោក សេដ្ឋា ថាវីស៊ីន​ មានឈ្មោះហៅក្រៅថា នីត កើតនៅក្រុងបាងកក ​នាថ្ងៃទី១៥ ខែកុម្ភៈ ឆ្នាំ១៩៦៣ បច្ចុប្បន្ន​មានអាយុ ៦០ ឆ្នាំ ។ លោក​បាន​សិក្សា​នៅ​សាលា​ Demonstration School of Srinakarinwirot University Prasarnmit ហើយបាន​បន្តទៅ​សិក្សា​នៅ​សហរដ្ឋ​អាមេរិក​ ដោយបញ្ចប់ថ្នាក់បរិញ្ញាបត្រផ្នែកសេដ្ឋកិច្ចនៅសាកលវិទ្យាល័យ Massachusetts និងបរិញ្ញាបត្រជាន់ខ្ពស់ផ្នែកគ្រប់គ្រងរដ្ឋបាល និងធុរកិច្ចពីសកលវិទ្យាល័យ Claremont Graduate University ផងដែរ ។

បន្ទាប់ពីបញ្ចប់ការសិក្សានៅឆ្នាំ ១៩៨៦ លោកបានត្រឡប់មកធ្វើការប្រទេសថៃនៅក្រុមហ៊ុន Procter & Gamble ដែលជាក្រុមហ៊ុនដ៏ធំមួយសម្រាប់ការផលិត និងចែកចាយទំនិញប្រើប្រាស់លឿនរហ័ស (FMCG) មុន​ចេញ​ទៅ​ធ្វើ​ជំនួញ​អចលនទ្រព្យ​ជាមួយ​បងប្អូនជីដូនមួយលោក Apichart Chutrakul​ ​​ក្នុង​ក្រុមហ៊ុន Sansamran Co., Ltd. ឬ Sansiri នា​ឆ្នាំ ១៩៩០ ។

លោកសេដ្ឋា បានបម្រើការជានាយកប្រតិបត្តិ និងជាប្រធានក្រុមហ៊ុន ហើយកំឡុងពេលកាន់តំណែងជាប្រធានក្រុមហ៊ុន Sansiri លោកបានធ្វើឲ្យក្រុមហ៊ុនមួយនេះរីកចម្រើនទៅជាក្រុមហ៊ុនអចលនទ្រព្យឈានមុខគេរបស់ប្រទេសថៃ ។ លើសពីនេះ លោកក៏បានជំរុញឲ្យក្រុមហ៊ុនអភិវឌ្ឍគម្រោងលំនៅឋានមួយនេះ ធ្វើយ៉ាងណាឆ្លើយតបប្រកបដោយគុណភាពទៅតម្រូវការគ្រប់ក្រុមអតិថិជនទាំងអស់ ។

ក្រោយមក​នៅដើមខែមេសា ឆ្នាំ ២០២៣ លោកបានប្រកាសលាលែងពីតំណែងទាំងអស់នៅក្រុមហ៊ុន Sansiri ហើយ​​ផ្ទេរ​ហ៊ុនទៅឲ្យកូនស្រីបង្កើត​ដោយ​គ្មានការទាក់ទើរ ដើម្បី​បង្ហាញ​ភាព​ស្មោះ​ត្រង់​របស់​ខ្លួន ត្រៀម​ខ្លួន​ធ្វើ​ការ​នយោបាយ​ក្នុង​នាម​ជា​បេក្ខជន​នាយក​រដ្ឋមន្ត្រី​គណបក្ស​ភឿថៃ ។​ ទោះទើបតែឈានចូលនយោបាយក៏ដោយ លោកសេដ្ឋា ត្រូវបានគេស្គាល់រួចទៅហើយ តាមរយៈការបញ្ចេញទស្សនៈផ្ទាល់ខ្លួនចំពោះនយោបាយសកលលោក និងបញ្ហាសង្គម ។ ជាពិសេសតាមរយៈការពង្រីកសមត្ថភាព ក្នុងការគ្រប់គ្រងសេដ្ឋកិច្ចធ្វើឲ្យការងើបឡើងវិញដោយបណ្តោះអាសន្នពីជំងឺរាតត្បាតកូវីដ-១៩ ។

ត្បិតថាមិនមានបទពិសោធន៍ផ្នែកនយោបាយ និងកើតក្នុងគ្រួសារអ្នកជំនួញក្ដី ប៉ុន្តែលោកសេដ្ឋា នៅតែបានដើរតួនាទីយ៉ាងសំខាន់ ក្នុងអំឡុងយុទ្ធនាការឃោសនាបោះឆ្នោតកាលពីខែឧសភាកន្លងទៅ ទោះគណបក្សភឿមិនបានទទួលសំឡេងគាំទ្រច្រើនដូចការរំពឹងទុកក៏ដោយ ។

យ៉ាងណាមិញលោក សេដ្ឋា បង្ហើប​ថា លោក​គ្មាន​សុបិន​ចង់​ចូល​ប្រឡូក​ក្នុង​ឆាក​នយោបាយ​ពី​មុន​មក​ទេ ប៉ុន្តែ​អ្វី​ដែល​ចាប់​ផ្តើម​ជំរុញ​ឲ្យ​លោក​ចាប់​អារម្មណ៍​នឹង​នយោបាយ​កាន់​តែ​ខ្លាំង គឺ​ចាប់​តាំង​ពី​រដ្ឋ​ប្រហារ​ ២ ​លើក​ចុង​ក្រោយ​នេះ ។ លោកយល់​ឃើញ​ថា ការ​ដណ្តើម​អំណាច​គឺ​ខុស និង​មិន​អាច​ទទួល​យក​បាន បូករួមទាំងបញ្ហាសង្គម សេដ្ឋកិច្ច និងនយោបាយកាន់តែពុះកញ្ជ្រោលខ្លាំងឡើងក្នុងរយៈពេល ៦ ទៅ ៩ ឆ្នាំចុងក្រោយនេះ រួមទាំងការរីករាលដាលនៃកូវីដផងដែរ ។

លោកយល់​ឃើញ​ថា រដ្ឋាភិបាល​បច្ចុប្បន្ន​មិន​អាច​ធ្វើ​ឲ្យ​ប្រជាពលរដ្ឋ​មាន​ជីវិត​រស់នៅសុខស្រួល ក៏ដូចមានសិទ្ធិសេរីភាពបាន​ឡើយ ដូច្នេះហើយ ទើបលោកសម្រេចចិត្តចូលជាសមាជិកគណបក្សភឿថៃ ដោយសារជឿថា ភឿថៃជ្រើសរើសយកប្រជាជនជាផ្នែកដ៏សំខាន់របស់បក្ស ។

ចំណែកជីវិតគ្រួសារវិញ លោក សេដ្ឋា ថាវីស៊ីន បានរៀបការជាមួយលោកស្រី Pakpilai Thavisin ជា​វេជ្ជបណ្ឌិត​ឯកទេសផ្នែកសម្រស់ផ្នែកស្បែកនៅ​មន្ទីរពេទ្យ​ឯកជន​មួយកន្លែង និងមានចំណងដៃកូនប្រុសស្រីចំនួន ៣ នាក់ដែលបច្ចុប្បន្នេះ អ្នកទាំង ៣ សុទ្ធតែពេញវ័យកំលោះក្រមុំអស់ទៅហើយ ។

គួរបញ្ជាក់ដែរថា លោកនាយករដ្ឋមន្ត្រីថៃ សេដ្ឋា ថាវីស៊ីន នឹងធ្វើដំណើរទស្សនកិច្ចផ្លូវការក្នុងប្រទេសកម្ពុជានាថ្ងៃទី២៨ ខែកញ្ញា តបតាមការអញ្ជើញរបស់ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ នេះបើយោងតាមសេចក្ដីប្រកាសព័ត៌មាន ដែលចេញផ្សាយក្រសួងការបរទេសនិងកិច្ចសហប្រតិបត្តការណ៍អន្តរជាតិ៕

ប្រែសម្រួល៖ សាង ស្រីល័ក្ខ

ចុចអាន៖ជំនួបរវាងសម្ដេចធិបតី ហ៊ុន ម៉ាណែត និងនាយករដ្ឋមន្ត្រី ថៃ ផ្ដោតលើការ​ឆបោកឆ្លងដែនតាមអនឡាញ