មកដឹងចំនួនសំឡេងគាំទ្រសរុបដែលលោក ស្រេតថា ទទួលបានក្នុងការ​បោះឆ្នោតសភា ក្លាយជានាយករដ្ឋមន្ត្រី

បេក្ខភាពមកពីគណបក្សភឿថៃលោក ស្រេតថា ថាវីស៊ីន នៅថ្ងៃអង្គារនេះត្រូវបានសមាជិករដ្ឋសភា និងព្រឹទ្ធសភាបោះឆ្នោតជ្រើសរើសជានាយករដ្ឋមន្ត្រីទី ៣០ របស់ប្រទេសជាមួយនឹងសំឡេងគាំទ្រចំនួន ៤៨២, ប្រឆាំង ១៦៤ និងអនុបវាទចំនួន ៨១ សំឡេង ក្នុងចំណោមសមាជិកសភាទាំងពីរដែលមានចំនួនសរុប ៧២៨ រូប ។

ទន្ទឹមនោះ ក្នុង​ចំណោម​សំឡេង​ឆ្នោតគាំទ្រ​ទាំង ​៤៨២ ​សម្រាប់​លោក ស្រេតថា ​មាន ​៣៣០ ​សំឡេងកើតចេញ​ពី​សមាជិករដ្ឋសភា ​និង ​១៥២ សំឡេងមក​ពី​សមាជិក​ព្រឹទ្ធសភា ខណៈដើម្បីក្លាយជានាយករដ្ឋមន្ត្រីគណបក្សឈ្នះឆ្នោតត្រូវសំឡេងគាំទ្រពីសមាជិករដ្ឋសភា និងព្រឹទ្ធសភាយ៉ាងតិច ៣៧៦ ។

ដោយឡែកសម្រាប់​សំឡេង​ឆ្នោតបោះប្រឆាំងឧកញ៉ាអចលនទ្រព្យវ័យ ៦០ ឆ្នាំ​ទាំង ១៦៤ នេះមានសមាជិករដ្ឋសភា ១៥២ រូប និង ១២ រូប​ជា​សមាជិក​ព្រឹទ្ធសភា ខណៈ​សំឡេងអនុបវាទ​ចំនួន ៨១ គឺ​មក​ពី​សមាជិករដ្ឋ​សភា ១៣ ​រូប និង​សមាជិក​ព្រឹទ្ធសភា ៦៨ ​រូប ។

គួរបញ្ជាក់ថា ការជ្រើសរើសបាននាយករដ្ឋមន្ត្រីថ្មីនេះ ក៏បញ្ចប់ភាពជាប់គាំងផ្នែកនយោបាយក្នុងការបង្កើតរដ្ឋាភិបាលថ្មីរបស់ថៃផងដែរ បន្ទាប់ពីអូសបន្លាយពេលប្រមាណ ១០០ ថ្ងៃមកហើយ ចាប់តាំងពីការបោះឆ្នោតកាលពីថ្ងៃទី១៤ ខែឧសភាមក ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ថៃ រកបាននាយករដ្ឋមន្ត្រីថ្មីហើយ ក្រោយជាប់គាំងអស់ពេល ៣ ខែ