រុស្ស៊ី វ៉ាដាច់ អាល្លឺម៉ង់ ឡើងលេខ៥ ជាមហាអំណាចសេដ្ឋកិច្ចពិភពលោក

ប្រធានាធិបតីរុស្ស៊ី វ្ល៉ាឌីមៀរ ពូទីន បាននិយាយកាលពីថ្ងៃអង្គារទី២២ខែសីហាថា រុស្ស៊ីបានទម្លាក់អាល្លឺម៉ង់ ក្លាយខ្លួនទៅជាប្រទេសដែលមានសេដ្ឋកិច្ចធំជាងគេទាំងប្រាំ របស់ពិភពលោកនៅឆ្នាំ២០២២ ដោយផ្អែកលើយុគភាព​នៃ​អំណាច​ទិញ (PPP) បើទោះបីជាមានការដាក់ទណ្ឌកម្ម និងការព្យាករពីការដួលរលំដោយបស្ចិមប្រទេសក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការប៉ាន់ប្រមាណដោយផ្អែកលើទិន្នន័យផ្លូវការ ដែលចេញផ្សាយដោយធនាគារពិភពលោក និងមូលនិធិរូបិយវត្ថុអន្តរជាតិ (IMF), ផលិតផលក្នុងស្រុកសរុបរបស់រុស្ស៊ី មានចំនួន ៥.៥១ទ្រីលានដុល្លារក្នុងលក្ខខណ្ឌ PPP នៅចុងឆ្នាំមុន។ របាយ​ការណ៍​បាន​កត់​សម្គាល់​ថា តួ​លេខ​នេះ​គឺ​ធំ​ជាង​ការ​ប៉ាន់​ស្មាន​​ផ្លូវ​ការរហូតដល់ទៅ ៣៨%ឯណោះ ពោលគឺប៉ាន់ស្មានត្រឹម ៣.៩៩៣ ទ្រី​លាន​ដុល្លារប៉ុណ្ណោះ។

ថ្លែងនៅឯក្រុមប្រឹក្សាអភិវឌ្ឍន៍យុទ្ធសាស្ត្រនិងគម្រោងជាតិ លោក ពូទីន បានកត់សម្គាល់ថា រឿងនេះកើតឡើង បើទោះបីជាមានការព្យាករទុទិដ្ឋិនិយម ពីសំណាក់អ្នកជំនាញមួយចំនួន ជាពិសេសអ្នកជំនាញបស្ចិមប្រទេសក៏ដោយ។ លោក​​បញ្ជាក់​ថា ការ​វាយតម្លៃ​ដែល​បង្ហាញ​ថា ​រុស្ស៊ី​បាន​វ៉ា​ដាច់​ប្រទេស​អាល្លឺម៉ង់​ ក្នុង​លក្ខខណ្ឌ​នៃ PPP គឺច្បាស់​ណាស់។

ថ្មីៗនេះ ទាំង IMF និងធនាគារពិភពលោក សុទ្ធតែបានបង្កើនការព្យាកររបស់ពួកគេ សម្រាប់សេដ្ឋកិច្ចរុស្ស៊ីដោយនិយាយថា ថ្វីបើមានទណ្ឌកម្មក៏ដោយ​ GDP រុស្ស៊ីនឹងបន្តកើនឡើង ព្រោះតែពាណិជ្ជកម្មរឹងមាំ និងផលិតកម្មឧស្សាហកម្ម ក៏ដូចជាប្រាក់ចំណូលថាមពលខ្ពស់ជាងការរំពឹងទុកផងដែរ។

លើសពីនេះ នាយករដ្ឋមន្ត្រីរុស្ស៊ីលោក Mikhail Mishustin បានព្យាករថា នៅឆ្នាំ២០២៤ កំណើនសេដ្ឋកិច្ចរុស្ស៊ី ក៏នឹងវ៉ាដាច់បណ្តាប្រទេសអភិវឌ្ឍទៀតផងដែរ ៕

ប្រែសម្រួល៖ Vann Vann

ប្រភព៖ RT

ចុចអាន៖ ពូទីន៖ ណាតូ អាចពង្រីកផែនការនៅអាស៊ី ដើម្បីបម្រើតម្រូវការ របស់អាមេរិក