លោក Srettha ប្តេជ្ញាធ្វើការឲ្យអស់ពីសមត្ថភាព ដើម្បីលើកកម្ពស់ជីវភាពរស់នៅរបស់ប្រជាជន

នាយករដ្ឋមន្ត្រីជាប់ឆ្នោតលោក Srettha Thavisin បាននិយាយកាលពីថ្ងៃអង្គារទី២២ខែសីហាថា លោកបានត្រៀមខ្លួនរួចរាល់ហើយ ដើម្បីធ្វើការឲ្យអស់ពីសមត្ថភាព ដើម្បីលើកកម្ពស់ជីវភាពរស់នៅរបស់ប្រជាជនថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅ​ទីស្នាក់ការ​គណបក្ស​ភឿថៃ បន្ទាប់​ពី​សភា​បាន​បោះឆ្នោត​ជ្រើសរើស​លោក​ជា​នាយក​រដ្ឋមន្ត្រី​, លោក Srettha និយាយថា “ខ្ញុំពិតជាមានកិត្តិយសណាស់ ដែលត្រូវបានបោះឆ្នោតជ្រើសរើសជានាយករដ្ឋមន្ត្រីទី៣០។ ខ្ញុំ​សូម​អរគុណ​ប្រជាជន​ថៃ គណបក្ស​ចម្រុះ និង​សមាជិក​ព្រឹទ្ធសភា​ទាំងអស់ ​ដែល​បាន​បោះឆ្នោត​នៅថ្ងៃនេះ។ ខ្ញុំ​នឹង​ប្រឹង​ឲ្យអស់​ពី​សមត្ថភាព បំភ្លេច​ភាព​នឿយហត់​ពី​អតីតកាល និង​លើក​កម្ពស់​ជីវភាព​ប្រជាជន​ថៃ​ទាំង​អស់”។

ទន្ទឹមនោះ នៅ​ពេលអ្នកសារព័ត៌មាន​សួរ​ថា តើ​លោក​ត្រៀម​ខ្លួន​ធ្វើ​ជា​នាយក​រដ្ឋមន្ត្រីហើយឬនៅ លោក Srettha បាន​លើក​កណ្តាប់​ដៃ ​ហើយ​និយាយ​ថា “រួចរាល់ហើយ”។

ទោះបីជាយ៉ាងណាក៏ដោយ លោកបានបដិសេធឆ្លើយសំណួរផ្សេងទៀត ដោយនិយាយថា គ្រប់យ៉ាងត្រូវចាំរហូតដល់ការបោះឆ្នោតជ្រើសរើសលោក ទទួលបានការយល់ព្រមពីព្រះមហាក្សត្រជាផ្លូវការសិន ហើយសន្និសីទ​សារព័ត៌មាន​​ នឹង​ត្រូវ​ធ្វើ​ឡើង​នៅ​ពេល​នោះ។

សូមបញ្ជាក់ជាថ្មី បេក្ខភាពមកពីគណបក្សភឿថៃរូបនេះ ត្រូវបានសមាជិករដ្ឋសភា និងព្រឹទ្ធសភាបោះឆ្នោតជ្រើសរើសជានាយករដ្ឋមន្ត្រីទី ៣០ របស់ប្រទេស ជាមួយនឹងសំឡេងគាំទ្រចំនួន ៤៨២, ប្រឆាំង ១៦៤ និងអនុបវាទ ៨១ សំឡេង ក្នុងចំណោមសមាជិកសភាទាំងពីរដែលមានចំនួនសរុប ៧២៨ រូប។

ទន្ទឹមនោះ ក្នុង​ចំណោម​សំឡេង​ឆ្នោតគាំទ្រ​ទាំង ​៤៨២, ​មាន ​៣៣០ ​សំឡេងកើតចេញ​ពី​សមាជិករដ្ឋសភា ​និង ​១៥២ សំឡេងមក​ពី​សមាជិក​ព្រឹទ្ធសភា៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ មកដឹងចំនួនសំឡេងគាំទ្រសរុបដែលលោក ស្រេតថា ទទួលបានក្នុងការ បោះឆ្នោតសភា ក្លាយជានាយករដ្ឋមន្ត្រី