អ្នកនេសាទ ៣ នាក់នៅវៀតណាម ពុលត្រីក្រពត រហូតស្លាប់ម្នាក់

អ្នកនេសាទ ៣ នាក់នៅខេត្ត Kien Giang ភាគខាងត្បូងប្រទេសវៀតណាមបានពុលត្រីក្រពត បន្ទាប់ពីបរិភោគស៊ុបជាមួយពងរបស់វា ។

ក្នុងនោះមានអ្នកស្លាប់ម្នាក់ឈ្មោះ N.X.H. ចំណែកឯពីរនាក់ទៀតដែលរួចជីវិតគឺ Tran Phuong Binh វ័យ ៤៦ ឆ្នាំ និង Bui Dinh Linh វ័យ ៤១ ឆ្នាំ ។ ពួកគេត្រូវបានបញ្ជូនទៅកាន់មន្ទីរពេទ្យ Kien Giang នៅម៉ោងប្រហែល ១២ យប់ ថ្ងៃអាទិត្យ ទី២០ ខែសីហា ។

គ្រូពេទ្យវិនិច្ឆ័យរោគឃើញថា អ្នកទាំង ២ ពុលត្រីក្រពត ដោយសារមានសញ្ញាដូចជា ស្ពឹកមាត់ និងអណ្ដាត ឈឺក្បាល និងអស់កម្លាំងជាដើម ។ បច្ចុប្បន្នស្ថានភាពសុខភាព Binh និង Linh បានធូរស្បើយហើយ ដូច្នេះគ្រូពេទ្យនឹងឲ្យត្រឡប់ទៅផ្ទះវិញឆាប់ៗ ។

ទន្ទឹមនេះលោក Linh រៀបរាប់ថា នៅថ្ងៃសៅរ៍ ទី១៩ ខែសីហា អ្នកទាំង ៣ ចាប់បានត្រីក្រពតដ៏ធំមួយចម្ងាយ ៥០ គីឡូម៉ែត្រពីកោះ Nam Du ។ ពួកគេតែងតែបរិភោគត្រីក្រពត ប៉ុន្តែមិនដែលមានបញ្ហាអ្វីឡើយ ។

លុះថ្ងៃធ្វើស៊ុបហូបជុំគ្នាជាមួយត្រីក្រពតដែលមានផ្ទុកពង និងផឹកស្រាបន្តិចបន្តួច ស្រាប់តែបណ្ដាលឲ្យ N.X.H ស្លាប់ត្រឹមរយៈពេលប៉ុន្មានម៉ោងក្រោយប៉ុណ្ណោះ ។

បើតាមគ្រូពេទ្យនៅ Kien Giang បានណែនាំថា យើងគួរតែយកថ្លើមត្រីក្រពត ប្រមាត់ និងពងចេញសឹមបរិភោគ ព្រោះវាមានផ្ទុកជាតិពុលខ្ពស់ដែលអាចបង្កគ្រោះថ្នាក់ដល់អាយុជីវិត ៕

ប្រែសម្រួល៖ វារី

ប្រភព៖ tuoitrenews

ចុចអាន៖ ប្ដីប្រពន្ធមួយគូនៅ ម៉ាឡេស៊ី ពុលត្រីកំពត បន្ទាប់ពីទទួលទានលើកដំបូង