ព័ត៌មានអន្ដរជាតិ

សំឡេងឆ្នោតដែលបោះប្រឆាំងលោក ស្រេតថា មិនឲ្យធ្វើជានាយករដ្ឋមន្ត្រី ស្ទើរតែទាំងអស់កើតចេញពីបក្សលោក ភិថា

បានផុស

១ year មុន

នៅ

ថ្ងៃពុធ ២៣ សីហា ២០២៣

ដោយ

សំឡេងឆ្នោតស្ទើរតែទាំងអស់ដែលបោះប្រឆាំងនឹងលោក ស្រេតថា ថាវីស៊ីន មិនឲ្យធ្វើជានាយករដ្ឋមន្ត្រីថៃកាលពីថ្ងៃអង្គារ គឺកើតចេញពីគណបក្សចលនាឆ្ពោះទៅមុខរបស់លោក ភិថា លីមចារើនរ៉ាត់ ដែលបានឈ្នះការបោះឆ្នោតសកលកាលពីថ្ងៃទី១៤ ឧសភាកន្លងទៅ ។

សំឡេងឆ្នោតដែលបានបោះប្រឆាំងនឹងលោកឧកញ៉ាអចលនទ្រព្យវ័យ ៦០ ឆ្នាំរូបនេះមានចំនួន ១៦៤ សំឡេង ហើយក្នុងចំណោមការប្រឆាំងទាំងនោះមាន ១២ សំឡេងកើតចេញពីសមាជិកព្រឹទ្ធសភា និង ១៥២ សំឡេងមកពីសមាជិករដ្ឋសភា ខណៈស្ទើរតែទាំងអស់ចេញពីការបោះឆ្នោតប្រឆាំងដោយគណបក្សចលនាឆ្ពោះទៅមុខ ដែលមានសមាជិកសភាចំនួន ១៥១ រូប ។

ពាក់ព័ន្ធនឹងបញ្ហានេះដែរ មេដឹកនាំគណបក្សចលនាឆ្ពោះទៅមុខលោក ភិថា ក៏បានសរសេរបង្ហោះ បន្ទាប់ពីការបោះឆ្នោតនាយករដ្ឋមន្ត្រីថា រដ្ឋាភិបាលថ្មីដែលកើតចេញពីគណបក្សភឿថៃបានប្រឆាំងនឹងអាណត្តិរបស់ម្ចាស់ឆ្នោត ។ រដ្ឋាភិបាលថ្មីនេះនឹងមិនដែលនាំមកនូវការផ្លាស់ប្តូរក្នុងសង្គម ឬទទួលបានកិត្តិយសណាមួយឡើយ ដោយសារមានការខកចិត្តពីសាធារណជន និងបានលុបបំបាត់ការជឿទុកចិត្តលើប្រព័ន្ធគ្រប់គ្រង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភិថា បានសង្កត់ធ្ងន់ថា ឥឡូវនេះគណបក្សចលនាឆ្ពោះទៅមុខ នឹងដើរទទួលតួនាទីពេញលេញជាបក្សប្រឆាំង ប៉ុន្តែក៏នឹងឧស្សាហ៍តាមដានរដ្ឋាភិបាលថ្មី ផ្តល់ដំណោះស្រាយ និងស្នើច្បាប់ទៅតាមម្ចាស់ឆ្នោតចង់បានផងដែរ ។

លោកបានបញ្ជាក់ជាថ្មីថា គណបក្សរបស់លោកនឹងមិនក្បត់ការជឿទុកចិត្តរបស់ម្ចាស់ឆ្នោតឡើយ ហើយនឹងបន្តរក្សាការសន្យារបស់ពួកគេ ហើយថែមទាំងអះអាងយ៉ាងម៉ឺងម៉ាត់ផងដែរថា អំណាចចុងក្រោយនៅក្នុងប្រទេសគឺស្ថិតនៅជាមួយប្រជាពលរដ្ឋ ។

គួរបញ្ជាក់ថា លោក ស្រេតថា ថាវីស៊ីន បេក្ខភាពមកពីគណបក្សភឿថៃ ត្រូវបានសមាជិករដ្ឋសភា និងព្រឹទ្ធសភាបោះឆ្នោតជ្រើសរើសជានាយករដ្ឋមន្ត្រីទី៣០ របស់ប្រទេសជាមួយនឹងសំឡេងគាំទ្រចំនួន ៤៨២ , ប្រឆាំង ១៦៤ និងអនុបវាទចំនួន ៨១ សំឡេង ក្នុងចំណោមសមាជិកសភាទាំងពីរដែលមានចំនួនសរុប ៧២៨ រូប ៕